Një 32-vjeçar është arrestuar nga policia në Portin e Durrësit, pasi po tentonte të fuste në shqipëri një shumë parash, 31.120 paundë të futura në shasinë e furgonit pa i deklaruar.
Burimi i parave është i dyshimtë, teksa 32-vjeçar Aledin Kola, banues në Tiranë, u vu në pranga.
Gjatë kontrollit në furgon nga policia u gjetën veshje, vegla pune dhe pajisje elektroshtëpiake, të cilat dyshohet se janë të kontrabanduara pasi nuk kishin fatura blerjeje.
Makina, paratë dhe të gjithë sendet e gjetura në automjet u sekuestruan.
Materialet proceduriale i janë kaluar Prokurorisë së Durrësit, për veprat penale “Përvetësimi i parave ose mallrave që rrjedhin nga vepra penale ose veprimtaria kriminale”, “Mosdeklarimi në kufi i të hollave dhe i sendeve me vlerë” dhe “Kontrabanda me mallra të tjera”.
Discussion about this post