Kadastra e Vlorës ka ndryshuar sërish drejtuesin. Së fundmi në krye të Kadastrës së Vlorës është emëruar Ina Lucci, e cila ka mbajtur të njëjtin funksion në 2013-2014.
Lucci ka zëvendësuar në detyrë Erdet Mandin, i cili e mbajti këtë detyrë për disa muaj.
Dy muaj më parë, drejtuesja e re e Drejtorisë së Përgjithshme të Kadastrës Dallëndyshe Bici kallëzoi penalisht me akuzën “shpërdorim detyre” në SPAK tetë zyrtarë dhe ish zyrtarë të lartë të Kadastrës së Vlorës, mes tyre edhe Erdet Mandin.
Kadastra e Vlorës është një nga institucionet ku drejtuesit janë ndërruar çdo 4-5 muaj, gjë që është pohuar edhe nga Kryeministri Edi Rama, ditën që paralajmëroi nisjen e reformës në kadastër.
Ina Luçi ka drejtuar zyrën e Kadastrës në Vlorë rreth 10 vite më parë, ndërsa u largua në atë kohë me dorëheqje. Para se të dorëhiqej Luçit i dogjën automjetin në Vlorë, ngjarje që u konsiderua si e qëllimshme në atë kohë, madje policia shoqëroi edhe 5 persona si të dyshuar.
Ina Luçi qëndroi në detyrë 14 muaj (tetor 2013-dhjetor 2014), ndërsa pas saj janë dorëhequr të paktën 7 drejtorë të tjerë që qëndronin në detyrë nga 1 muaj në më pak se 2 vite.
Discussion about this post