Ndriçim Barani 44 vjeç, është dënuar ditën e sotme nga Gjykata italiane me 3 vite e 6 muaj burg, një prej të besuarve të vëllezërve Lamaj për trafikun e drogës që është kryer përmes avionëve të vegjël nga Shqipëria drejt Italisë në vitin 2015. Prokuroria italiane kishte kërkuar 50 vite burg në total për të gjithë grupin e trafikantëve shqiptarë dhe italianë që furnizonin Rivierën me marijuanë, por gjykata e Riminit ka caktuar me 9 vite burg në total.
Karabinierët e Riçiones të koordinuar me policinë e Bolonjës, në vitin 2015 zbuluan trafikun e drogës nga Shqipëria që kryhej përmes avionëve të vegjël, ku u kapën 200 kilogramë drogë. Nga goditja e policisë italiane përfunduan në pranga trafikantët italianë dhe ata shqiptarë, ku një prej tyre 44-vjeçari Ndriçim Barani u dënua me 3 vjet e 6 muaj burg.
Ai ishte njeriu i besuar i grupit të trafikantëve të kryesuar nga vëllezërit Lamaj, tashmë të dënuar në Shqipëri. Barani ishte ai që gjente klientët, duke ndërmjetësuar edhe shitjen e drogës dhe marrjen e parave nga blerësit. Dënimet për 4 bashkëpunëtorët e tjerë variojnë nga 2 vjet e 6 muaj deri në një vit e gjysmë.
Discussion about this post