Në fjalimin e tij në Kuvend, deputeti i PD, Ervin Salianji është shprehur se Partia Demokratike nuk do të ndalë në asnjë moment betejën e saj kundër korrupsionit që ka pllakosur të gjitha hallkat shtetërore, kundër padrejtësive në dëm të qytetarëve, kundër varfërisë dhe kundër regresit që Edi Rama po e çon gjithmonë e më shumë Shqipërinë.
“Ka nga ata të marrë që ëndërrojnë shkrirjen e Partisë Demokratike, apo nga ata që thonë se Partia Demokratike e ka mbyllur misionin e saj. Do të zhgënjeheni shumë shpejt! Partia Demokratike është partia me e suksesshme e tranzicionit shqiptar. Më kot shpresoni ta zhbëni këtë histori”- është shprehur Salianji.
Gjatë fjalës së tij në Parlement, Salianji tha se Partia Demokratike jo vetëm që përbën historinë më të bukur të dekadave të fundit të historisë së Shqipërisë, por është padyshim dhe e ardhmja e saj, pasi është e vetmja forcë politike që mund ta zhvillojë dhe ta çojë përpara këtë vend.
