Presidenti i vendit, Ilir Meta, ka përkujtuar sot 23-vjetorin e vdekjes se Azem Hajdarit. Përmes një postimi në Facebook, ai ka shprehur nder dhe vlerësim për figurën e tij, duke thënë se duhet të kthehet në frymëzim për të rinjtë shqiptar.
“Nderim, respekt dhe mirënjohje ndaj veprës së përjetshme të Azem Hajdarit, udhëheqësit të ‘Lëvizjes Studentore’, që solli pluralizmin politik dhe demokracinë. Energjia dhe guximi i Tij duhet të frymëzojnë përpjekjet tona për një Shqipëri si gjithë Europa!”, shkruan Meta.
Azem Hajdari është përkujtuar sot edhe nga kreu i PD Lulzim Basha i cili kreu homazhe para memorialit të tij. Basha shoqërohej nga disa deputetë të Partisë Demokratike, ndërkohë që u vu re mungesa e liderit historik të demokratëve Sali Berisha, si dhe familjarëve të Azem Hajdarit. E bija, Rudina Hajdari ka reaguar në profilin zyrtar në facebook ku shkruan se i ati ishte një politikan që nëse do të ishte gjallë do ta ndryshonte historinë.
