Epidemiologu i njohur, Erion Dasho, e ka nisur këtë të dielë me akuza të forta ndaj qeverisë sa i përket trajtimit të koronavirusit në vendin tonë. Përmes një postimi në Faecbook ai shkruan se, një pjesë e konsiderueshëm e mjekëve nuk kanë mjekuar në mënyrën e duhur pacientët, por kanë abuzuar me ta për të fituar sa më shumë para. Sipas mjekut, një pjesë e mirë e pacientëve në Shqipëri kishin simptoma të lehta që mund të trajtoheshin në një mënyrë më natyrale dhe më pak të kushtueshme, por mjekët i zvarrisnin për analiza dhe mjekime të panevojshme, të cilat jo vetëm që rënduan xhepat e tyre, por u bën shkak edhe për humbje jete.
“Padituria herë merr formën e një konspiracionisti, herë atë të një përfaqësuesi antiestablishment, herë atë të një dashnori të lirisë dhe jo rrallë, fatkeqësisht, shfaqet pas një tjetër bluze të bardhë të vendosur në anën e gabuar të barrikadës. Viti 2020 kaloi duke u mbushur mendjen qytetarëve të terrorizuar nga sharlatanët se 80% e të infektuarve nuk kishin nevojë për asnjë trajtim apo ekzaminim. I vetmi shpenzim i justifikuar ishte blerja e një puls oksimetri për ndjekjen e ecurisë së sëmundjes.
Çdo person që niste kollitej sado pak, u bë pre e mashtruesve dhe të paaftëve. Një listë e gjatë me analiza, referim për skaner dhe një recetë bombastike me antibiotikë e çoi faturën më të thjeshtë të trajtimit të COVID-it në 1 mijë euro. Jo rrallë, këto mjekime ishin përgjegjëse për dëmtimin e shëndetit, madje edhe për humbjen e jetës”, shkruan ai.
Sipas Dashos, më shumë se gjysma e të vdekurve nga koronaviursi, humbën jetën jo se nuk mund të përballonin sëmundjen, por nga papërgjegjshmëria e qeverisë. Mjeku thotë se këto abuzime vazhdojnë akoma, për shkak se një pjesë e mirë e pacientëve nuk janë të informuar dhe në kushtet që ndodhen pranojnë çdo sugjerim të mjekëve, që në shumë raste ka rezultuar abuzim se sa ndihmë.
“Pjesën më të madhe të 16 mijë fatkeqëve që vdiqën nga COVID-i i vrau papërgjegjshmëria e qeverisë, ministrisë dhe komitetit të marionetave politike. Por një pjesë jo të vogël të tyre, i vranë mjekimet e papërgjegjshme të marra pa asnjë logjikë mjekësorë nën presionin e injorantëve dhe makutëve. Sot këta injorantë mund të vrasin sërish duke ju mbajtur ju dhe fëmijët tuaj larg vaksinës.
Mos i lejoni! E deklaroj këtë si një ekspert dhe mik që nuk ka as edhe interesin më të vogël pas vaksinave dhe si një person që jap prej një viti e gjysmë këshilla që po të ishin dëgjuar, do të kishin shpëtuar me qindra jetë! Kush vaksinohet sot, e pret një dimër shumë më i sigurt dhe më i shëndetshëm! Nuk e them unë! E thotë çdo institucion dhe shkencëtar prestigjioz sot në botë”, shkruan ai.
Mjeku Erion Dasho dhe Ilir Alimehmeti kanë kritikuar shumë herë mënyrën e gabuar që mjekët trajtojnë pacientët me covid-19, vetëm për përfitime financiare.
