Agjencia për Zhvillimin Bujqësor dhe Rural (AZHBR) pasi i “zgjidhi” hallet e fermerëve po bën shpenzime marramendëse në fushën e IT-së. Drejtoresha Eranda Selmanaj po merret me sistemin e Teknologjisë dhe Informacionit, duke bashkëpunuar me Mirlinda Karçanajn e AKSHI-t. Kështu me datë 21 nëntor, AKSHI ka regjistruar në faqen e Agjencisë së Prokurimeve Publike një tender për shërbime në AZHBR. Konkretisht bëhet fjalë për prokurimin “Përmirësimi i sistemit të menaxhimit të informacionit për skemat kombëtare”, për AZHBR.
Në dokument evidentohet se ky projekt do t’i kushtojë AKSHI-t për gati 3 vjet punime. Më saktë në dokumente thuhet se 9 muaj do të zgjasë implementimi i sistemit të ri. Dhe për 2 vjet do të nënshkruhet kontrata për mirëmbajtje. Edhe shuma prej 2.4 miliardë lekësh do të ndahet për të dy lotet. Konkretisht 169,969,000 mijë lekë do të shkojnë për implementimin e sistemit dhe 67,962,000 për mirëmbajtën e tij.
Sipas të dhënave të paraqitura, paratë për këtë tender do të merren nga buxhetit i shtetit, sipas parashikimeve të përcaktuara nga Ministria e Bujqësisë. Kështu treshja Krifca-Karçanaj- Selmanaj po përmbushin më së miri misionin e zhvillimit të aferave për tenderë luksi në kohë krize. Atyre pak fituesve të granteve të kësaj agjencie shumë mirë mund t’u krijohej një cep tek e- albania, pa qenë nevoja e këtij investimi gjigant. Me kaq para mund të ndërtoheshin nja 30 stalla lopësh ose 100 komplekse serash me avull.
Po ky tender aq sa i shtrenjtë është edhe i pavend në këtë pikë, kur jemi në një kohë që vendi është në krizë, toka bujqësore e përmbytur, kafshët mbeten pa ushqim.
Gjithashtu, paratë mund të duhen për të siguruar platformën e-Albania, që po hakohet përditë.
Theksojmë këtu se ky sistem informacioni ekziston te AZHBR. AKSHI thjesht po ndihmon në përmirësimin e tij, për rritjen e sigurisë dhe mirëfunksionimin. Në fakt, e ndriti me sigurinë e portaleve qeveritare AKSHI dhe tashmë i mbeti vetëm portali i AZHBR-së. Të dhënat më private tonat janë në duart e hakerave dhe AKSHI derdh 2.4 miliardë lekë për një portal agjencie.
Kujtojmë se prej disa muajsh hakerat iranianë vazhdojnë të publikojnë të dhënat më sekrete të institucioneve tona, madje edhe të SHISH-it. Ndërsa në korrik dhe shtator portali e-Albania mori dy sulme duke u bllokuar për disda javë. U desh ndërhyrja e ekspertëve të FBI-së dhe Microsoft-it që të rikthehen shërbimet.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post