Erdogan mbërrin në Kryeministri, takimi me Ramën – VIDEO

Presidenti i Republikës së Turqisë, Recep Tayyip Erdoğan ka mbërritur në Kryeministri ku do të zhvillojë një takim me Kryeministrin Edi Rama.

Gjithashtu pas takimit në Kryeministri pritet të mbahet Këshilli i Bashkëpunimit të nivelit të lartë Shqipëri-Turqi dhe më pas do të bëhet firmosja e marrëveshjeve respektive mes dy vendeve.

Më pas kryeministri Rama dhe presidenti Erdogan do të mbajnë një deklaratë të përbashkët për shtyp.

Pas konferencës për mediet me Ramën, në orët e pasdites Erdogan do të marrë pjesë në inaugurimin e xhamisë së Namazgjasë.

Presidenti i Turqisë, Recep Tayyip Erdogan mbërriti sot në Shqipëri, ndërsa u prit në aeroportin e Rinasit nga zv/kryeministrja dhe ministrja e Infrastrukturës dhe Energjisë, Belinda Balluku, ministri për Evropën dhe Punët e Jashtme, Igli Hasani, ministri i Brendshëm, Ervin Hoxha dhe ministri i Ekonomisë, Kulturës dhe Inovacionit, Blendi Gonxhja.

Më pas Presidenti Erdogan dhe delegacioni shoqërues u pritën nga Presidenti i Republikës, Bajram Begaj me ceremoni shtetërore. Begaj dhe Erdogan patën edhe një takim kokë më kokë.

Gjatë vizitës së tij në Shqipëri, Erdoğan do të shoqërohet nga zonja e parë Emine Erdoğan, ministri i Jashtëm Hakan Fidan, ministri i Industrisë dhe Teknologjisë Mehmet Fatih Kacır, ministri i Tregtisë Ömer Bolat, ministri i Rinisë dhe Sportit Osman Aşkın Bak, ministri i Bujqësisë dhe Pylltarisë İbrahim Yumaklı, ministri i Transportit dhe Infrastrukturës Abdulkadir Uraloğlu, ministri i Energjisë dhe Burimeve Natyrore Alparslan Bayraktar, kreu i Kryesisë së Komunikimeve pranë Presidencës Fahrettin Altun, kreu i inteligjencës (MIT) İbrahim Kalın, kreu i Çështjeve Fetare Ali Erbaş, kryekëshilltari i Presidentit për Politikë të Jashtme dhe Siguri, Akif Çağatay Kılıç dhe kreu i Industrisë së Mbrojtjes, Haluk Görgün.