Presidenti turk Rexhep Tajip Erdogan thotë se vendi i tij mund të miratojë anëtarësimin e Suedisë në NATO nëse kombet evropiane “i hapin rrugën” kërkesës së Turqisë për t’u bashkuar me Bashkimin Evropian.
Erdogan, vendi i të cilit mban pezull miratimin përfundimtar të anëtarësimit të Suedisë në NATO, i bëri komentet në Ankara të hënën përpara se të nisej për në takimin e nivelit të lartë të aleancës në Vilnius të Lituanisë.
Turqia është një kandidate për t’u anëtarësuar në BE, por kërkesa e saj për anëtarësim ka ngecur për shkak të kthimit prapa të demokracisë dhe mosmarrëveshjeve me Qipron, anëtare e BE-së.
Ministri i Jashtëm i Suedisë shprehu optimizëm të hënën se Turqia do të heqë kundërshtimet e saj ndaj anëtarësimit suedez në NATO, duke thënë se pranimi i vendit nordik është një çështje se kur do të ndodhë, jo nëse do të ndodhë.
Presidenti turk Rexhep Tajip Erdogan dhe kryeministri suedez Ulf Kristersson pritet të takohen më vonë të hënën në kryeqytetin lituanez, Vilnius, përpara një samiti dy-ditor të NATO-s.
Turqia ka bllokuar pranimin e Suedisë në NATO, duke thënë se duhet të bëjë më shumë për të goditur militantët kurdë dhe grupet e tjera që Ankaraja i konsideron si kërcënime për sigurinë e saj kombëtare. Protestat anti-turke dhe anti-islamike në Stokholm ngritën dyshime se një marrëveshje mund të arrihet përpara samitit të aleancës.
Billström tha se Suedia e ka përmbushur pjesën e saj të një marrëveshjeje tripalëshe që Suedia, Finlanda dhe Turqia nënshkruan në samitin e NATO-s të vitit të kaluar në Madrid.
Suedia dhe Finlanda aplikuan për anëtarësim në NATO vitin e kaluar pas pushtimit të Ukrainës nga Rusia. Finlanda u bashkua në prill të këtij viti.
Discussion about this post