Korporata Elektroenergjitike Shqiptare është institucioni që në kulmin e krizës energjetike është shquar për keqmenaxhimin e prodhimit dhe të fondeve të prokuruara. Teksa muajt e fundit situata energjetike ka filluar të përmirësohet, drejtori ekzekutiv Ergys Verdho mundohet të krijojë mundësi të reja për aferat me paratë që ka në administrim.
Këtë herë drejtori ka hedhur në lojë një shumë të madhe parash për disa studime në liqenin e Fierzës. Konkretisht, bëhet fjalë për tenderin me objekt “Loti 1 Batimetria e liqenit Fierzë, vlerësimi i sedimenteve dhe vlerësimi gjeologjik i shpateve malore”.
Për këtë tender është vënë në dispozicion fondi me vlerë 1.1 miliardë lekë, që do të xhirohen në llogarinë e operatorit ekonomik brenda katër muajsh.
Në dokumente sqarohet se përmes këtij tenderi do të bëhet relievi tredimensional i shtratit të liqenit. Duke parë më poshtë që për këtë shërbim do të përdoret një pajisje e veçantë me sonar, e cila kushton rreth 100 mijë euro, Verdho mund të thotë se shërbimi e justifikon çmimin e projektit.
Por, duhet të theksojmë se përveç parave të pajisjes, vlera e tenderit 1.1 miliardë lekë do të shpenzohet vetëm për 1 prej lotëve, sepse ky projekt është i ndarë në disa lote. Dhe është e theksuar se për secilin lot afati i punimeve do të zgjasë 4 muaj dhe sigurisht do të zhvillohet nga një tender më vete që kap miliarda lekë.
Red Flag
Ndërkohë, ajo që e sjellë në qendër të vëmendjes këtë projekt është “Flamuri i Kuq” që ai mban për shkak të parregullsive. Monitoruesi Open Data Albania e ka renditur në listën e kontratave abuzive, për shkak se ka mungesë të konkurrencës.
Në dokument, duket qartë që vetëm firma “GJEOKONSULT & CO” sh.p.k ka paraqitur një ofertë, që është sa 99% e fondit limit. Duke vepruar në kundërshtim me ligjin, drejtori Verdho ia dha fitoren kompanisë së vetme, kur mund ta anulonte tenderin. GJEOKONSULT & CO” sh.p.k është një firmë e cila pa u ndjerë fiton tenderë me vlera të larta nga institucionet më të rëndësishme si FSHZH, ARRSH si dhe nga ujësjellës kanalizimet në disa qytete. Vetëm në këto vitet e fundit numëron 6 miliardë lekë të vjelura nga tenderët.
Aferat e Mustafajt
Kompania është themeluar nga Hamit Mustafa, i cli ka lidhje të fuqishme me Erion Veliajn dhe ka përfituar leje ndërtimi për pallate, tenderë me vlerë miliona euro dhe favore të tjera. Po ashtu tenderë të tjerë ka fituar nga Fondi Shqiptar i Zhvillimit.
Kujtojmë protestat e mëdha të banorëve për pallatin e Mustafës që u ngul me lejen e Veliajt tek sheshi i lojërave në pranë Unazës së Madhe në Astir.
Në fund të vitit të kaluar, Hamit ia kaloi administrimin dhe pronësinë të birit Xhevahirit, i cili vazhdon këtë biznes.
Duke parë licencat që ka në zotërim kjo kompani, shohim se ka aftësi për shpimin e puseve për ujë, studime mjedisi dhe të burimeve ujore, si dhe projektime.
Gjithsesi në portofolin e saj të kontratave publike nuk ka një punë të tillë me kaq rëndësi sa vlerësimi batimetrik i shpateve të Liqenit të Fierzës. Bëhet fjalë për evidentimin e rrezikut të rrëshqitjeve të tokës, të depozitimit të mbetjeve në tabanin e liqenit dhe aksidentet e mundshme tek diga për shkak të këtyre fenomeneve natyrore. Për shkak të rëndësisë së madhe të objektit të tenderit, do të duhej që Verdho t’i rezistonte joshjes për korrupsion dhe të bënte një tender të ndershëm ndërkombëtar, ku të ftonte edhe kompani të huaja me eksperiencë në këtë fushë.
Sipas burimeve të kontaktuara nga Gijotina.com, KESH ka të instaluara pajisje të veta që bëjnë matjet periodike në zonat e evidentuara me rrezik rrëshqitje të shpateve. Pra, KESH i ka të dhënat dhe përllogaritjet, por e reja që do të sjellë ky tender janë pamjet 3D.
Le të kryqëzojmë gishtat që drejtoria e sigurisë së digave, apo dikush më lart Verdhos, t’i thotë se kjo punë publike nuk mund t’i besohet kujtdo! Këtu luhet me fatin e Hidrocentralit të Fierzës, prandaj këto para nuk mund t’i jepen një kompanie që fiton tenderë me “flamur të kuq” dhe noton në ujëra me risk të lartë korrupsioni.
Balluku “çel” Bursën, Ergys Verdho dhe Adrian Çela bëjnë tendera për 3 vitet e ardhshme
Discussion about this post