Abuzimet me tenderët e spitaleve janë më të kamufluarat, pasi fshihen pas kritereve teknike, por kompanitë pjesëmarrëse kanë nisur të tregojnë të palarat e këtyre prokurimeve. Përveç cenimit të barazisë dhe konkurrencës, shkelja e ligjit në këto tenderë mund të sjellë vonesa dhe mangësi në shërbimet ndaj pacienteve nëpër spitale.
Në fakt, drejtorët e spitaleve duket se nuk mendojnë shumë për këtë pjesë, por bëjnë gjithçka që kontratat t’i lidhin me miqtë që i favorizojnë.
Një rast i tillë është në Spitalin e Pogradecit. Më datë 20 maj 2024, Drejtoria e Shërbimit Spitalor Pogradec ka hapur tenderin me objekt “Blerje dhe instalim i pajisjeve mjekësorë për nevoja te Drejtorisë se Shërbimit Spitalor Pogradec”. Sipas dokumenteve, për të blerë dy pajisje janë lënë në dispozicion 100 milionë lekë.
Sigurisht këto blerje janë të rëndësishme dhe për këtë arsye drejtori Erion Thëngjilli duhej të ishte treguar i kujdesshëm që procedura të mbështetet në ligjin mbi prokurimet.
Më datë 27 maj 2024, firma “BIOMETRIC ALBANIA”, në pronësi të Artur Kadares ka bërë një denoncim. Në fakt, Kadareja është mjeshtër i tenderave të Shëndetësisë, ku ka përfituar prej vitesh kontrata me “Flamur të kuq”, i favorizuar nga zyrtarët. Tani që me sa duket iu prish pazari, Kadareja kërkon drejtësi. Kjo është edhe një taktikë, që të përfitohet kohë duke e shtyrë vendimmarrjen në dorë të institucionit qendror Komisionit të Prokurimeve Publike.
Gjithsesi kjo ankesë e Kadaresë na ndihmon të kuptojmë mekanizimin e manipulimit të këtij tenderi. Të shohim pikat që ai denoncon, duke ngritur dyshimin se drejtori Erion Thëngjilli e e ka paracaktuar më parë fituesin.
Biznesmeni Kadare kundërshton në një nga pikat ku përcaktohet se si duhet të jetë dizajni i jashtëm i pajisjeve që do të blihen. Në ankesë ai shprehet se ato janë pajisje, pjesët e të cilave mund të blihen edhe të ndara, sepse varet nga prodhuesi. Duke shtuar këtu që prodhues të ndryshëm mund t’i japin dizajnë të ndryshëm, por që në funksion nuk ndryshojnë nga njëra tjetra. Prandaj kërkohet që ky kriter të ndryshohet.
“Ofrimi i ketyre dy moduleve ne mënyrë te veçuar apo si njësi e vetme, është një zgjedhje e kompanive prodhuese persa i përket marketingut apo dizajnit (pamjes se jashtme) te sistemit, por ne finale ato kryejnë te njëjtin funksion për te cilin është projektuar pajisja dhe sigurojnë te njëjtin output tek përdoruesi (stafi mjekësor) apo pacient”, thuhet në ankesë.
Më tutje ankimuesi shprehet se në tender janë vendosur disa kritere që flasin për pajisje më të vogla, ndërsa objekti kërkon paisje më të mëdha. Pra kë një mos përputhje të kritereve me objektin e tenderit.
Në një pikë tjetër, në ankesë theksohet se “Sistemi per transferimin dhe arkivimin e imazheve dhe videove dixhitale në mënyrë kompjuterike (pra me anë të një kompjuteri ose laptopi) eshtë një kriter kufizues, pasi ky funksion mund të kryhet lehtësisht edhe nëpërmjet sistemeve apo pajisjeve dixhitale të cilat nuk janë kompjuter ose laptop”. Duke theksuar këtu se komisioni i hartimit të tenderit ka shtuar kritere për të cilat as vetë nuk janë të vetëdijshëm se çfarë janë dhe si funksionojnë.
Epo, kështu biznesmeni “i revoltuar”, dhe i mësuar të fitojë gjithnjë, i paska nxjerrë të palarat Thëngjillit. Nga këto që raportuam ka punë për KLSH-në, por ndoshta edhe për SPAK-un.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post