Kolegët po bien një e nga një në rrjetën e SPAK-ut, por jehona e hetimeve nuk i pengon drejtorët e Veliajt të vazhdojnë abuzimet me tenderët. Siç duket, për këtë brez zyrtarësh nuk është morali dhe ligji që përcakton drejtimin, por vetëm përfitimi material.
Së fundmi, drejtorja e përgjithshme e Çerdheve dhe Kopshteve në Tiranë, Zhaneta Beqiri, ka firmosur një prokurim me shkelje të rregullave.
Valëvitet “Flamuri i kuq”
Bëhet fjalë për tenderin me numër reference REF-00981-04-11-2024 dhe objekt “Blerje gaz i lëngët për gatim”. Fondi limit 100.4 milionë lekë do të shpenzohet për furnizimin me 74220 kg gaz të kuzhinave të çerdheve.
Open Data Albania e ka vlerësuar menjëherë tenderin me ‘Flamur të Kuq’, që është shenja treguese e riskut të korrupsionit.
Deri më 29 prill 2024, kur ka qenë afati i fundit i dorëzimit të ofertave, firma Gas Group SHPK në pronësi të Artan Kokës dhe Bilbil Kastratit, ka qenë e vetmja që ka paraqitur letrat. Kastrati është gjithashtu aksioner i Grupit “Kastrati” që kontrollon shumicën e tregut të naftës. Oferta e parë e operatorit të vetëm që ka marrë pjesë në tender është 99 milionë lekë që është gati sa fondi limit.
Duke parë se është i njëjti fond limit si vitin e kaluar dhe është e njëjta kompani përfituese na lindin pikëpyetje të mëdha.
Së pari, duke konstatuar se në shpalljen e fituesit nuk fiksohet vlera e fitimit/kg pyesim sa fiton operatori në këtë kontratë? Së dyti, si e ka përllogaritur fondin limit stafi i Bashkisë Tiranë që menaxhon drejtorinë e Kopshteve dhe Çerdheve? Kujtojmë se çmimi gazit në bursë qysh prej një viti nuk ka luhatje të mëdha.
Aktualisht çmimi i një ton gaz të lëngshëm sipas Doganës shqiptare që i referohet bursës, është 438 USD/ton për butanin dhe 499 USD/ton për propanin. Çmimi i shitjes me pakicë në pikat e kryeqytetit është mesatarisht 59 lekë/kg.
Me një përllogaritje të thjeshtë: 74220 kg gaz i lëngshëm sot kushton 4 378 980 lekë (të reja). Ndërkohë diferenca me shumën totale që i do t’i paguajë Bashkia e Lali Erit kompanisë së Kastratit është 5 603 610 lekë ( të reja) më shumë se sa vlera reale e shitjes. Ku shkon ky fitim? Nuk ka kuptim të zhvillosh tender për të marrë këtë rezultat. Prandaj i japim shumë të drejtë monitoruesit që ngre “Flamurin e kuq” për korrupsion.
Nëse tenderi nuk do të ishte i korruptuar, do të kishte pjesëmarrje të konkurrentëve dhe transparencë, rrjedhimisht do të kursehej fondi i caktuar.
Lidhjet e Bashkisë Tiranë me Gas Group SHPK janë më të hershme. Kompania ka fituar 14 kontrata nga drejtorët e Erion Veliajt, gjithmonë e favorizuar duke përfituar tenderat pa konkuurencë. Prandaj edhe kjo kontratë u firmos me ofertën dy herë më të shtrenjtë se sa tregu, pa garë të rregullt dhe në vijim të përvetësimit të fondeve.
Pak javë më parë, 3 drejtorë të Bashkisë Tiranë ranë në prangat e SPAK dhe i vetmi reagim që pati Veliaj ishte deklarata “ne i larguam nga puna”.
“Sot e kam nisur ditën me një takim, ku morëm vendimin për largimin e disa kolegëve sepse organizata e madhe është më e rëndësishme se 1 apo 2 persona, të cilët mund të kenë probleme me ligjin dhe duhet t’i zgjidhin këto probleme me drejtësinë. Unë uroj që të provojnë pafajësinë e tyre, por teksa i zgjidhin ato probleme, na duhet që organizata të vazhdojë përpara”, ka thënë Veliaj më datë 3 prill 2024.
Ndërsa ne, si qytetarë të thjeshtë, urojmë që SPAK të shkojë më thellë në këtë “organizatën” e drejtorëve që përvetësojnë paratë e tenderëve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post