Berisha është pritur me brohorima dhe thirrje entuziaste në Vlorë nga simpatizantët. Ai mbërriti pasditen e sotme për të mbajtur Foltoren e tretë në Pallatin e Kulturës së qytetit bregdetar.
Ish-kryeministri Sali Berisha po mban sot “Foltoren” e tretë në qytetin e Vlorës me demokratët. Para Pallatit të Kulturës në qytetin bregdetar kanë dalë mbështetës të ish-kryeministrit.
Mes pritësve janë dhe deputetët Flamur Noka e Bujar Leskaj, ish-Presidenti Nishani apo dhe kryetari i degës së PD në Vlorë, Genc Deromemaj.
Deromemaj në një prononcim për mediat ka deklaruar se demokratët e Vlorës po presin ish-liderin historik. Ai gjithashtu është shprehur se nuk ka pasur presione për mbështetjen e aksionit të Berishës.
“Demokratët e Vlorës, anëtarësia po pret liderin historik të PD, ish-kryeministrin Berisha. Jo, nuk kam pasur presione, në mënyrë absolute. Kam thërritur, publikisht që është e mbështetur mbi idetë dhe parimet e PD. I qëndrojë kësaj thirrje. Shpresojmë që PD pas kësaj lëvizje do të jetë e mundur që të shporrim këtë qeveri” – tha kreu i degës së PD Vlorë.
Kujtojmë se kreu i degës së Vlorës ka pasur pakënaqësi me kryetarin e Partisë Demokratike, Lulzim Basha, për shkak se nuk u kandidua për deputet.
