Kryebashkiaku i Vlorës, Ermal Dredha, bën një tender për llambat e rrugëve, ku më shumë ka menduar të “qerasë” dy biznesmenë, sesa për ndriçimin. Ky është një tender që bashkia e zhvillon çdo vit, ku ndryshon vetëm fondi limit. Nga viti 2020 deri tani, fondi për tela dhe poça është fryrë me të paktën 30%.
Këtë trend e ka krijuar tashmë kryebashkiaku i Vlorës. Ermal Dredha. Së fundmi bëhet fjalë për tenderin me objekt ‘Blerje materiale elektrike (për ndriçimin publik dhe institucional)’.
Për këtë prokurim janë vënë në dispozicion 130 milionë lekë, me të cilat do të furnizohen llamba rruge dhe kabllo të përmasave të ndryshme.
Gjithsesi në dokument as nuk është përcaktuar se për cilat zona nevojiten këto llamba, sepse siç e përmendëm më sipër, ky tender nuk niset nga nevojat e bashkisë, por nga interesi për të nxjerrë këto lekë nga arka përmes një tenderi të dyshimtë.
Data 3 maj 2024 ka qenë data e fundit për paraqitjen e ofertave dhe në të njëjtën ditë është zhvilluar gara. Kjo për shkak se nga 3 oferta, dy prej tyre u skualifkuan që në fazën e parë me argumentin se nuk kanë paraqitur mostra të produktit. Epo për këtë mungesë operatorët duhej të njoftoheshin dhe jo të mbyllej gara me nxitim se kështu i intereson kryetarit Dredha. Për më tepër që firma SARK shpk kishte paraqitur ofertën më të ulët me vlerë 118 milionë lekë, 12 milionë lekë më lirë se fondi limit.
Por kryetarit Dredha nuk i shkon nëpër mend ta kursejë fondin duke marrë oferta të përshtatshme dhe konkurruese.
Siç shihet në dokumentin më sipër, Open Data Albania e ka shënuar tenderin me “Flamur të kuq”, që është shenja e riskut të korrupsionit.
Me miratimin e Dredhës njësi e prokurimit e mbylli tenderin pa garë të rregullt dhe ia dhuroi kontratën firmës “AA&P” sh.p.k, në pronësi të Zihni Halimit – 50% dhe Dashnor Hajdërajt. Oferta e tyre kishte vlerën 125 milionë lekë, pra 7 milionë lekë më shtrenjtë se ofertat e tjera. Janë diferenca që mund të kurseshin, nëse do të zhvillohej tenderi pa shkelje të ligjit
Ndërkohë vërejmë që kjo kompani nuk ka bërë raportim në QKB të pasqyrave financiare për vitin 2023, një kriter kryesor që duhet të plotësojnë operatorët ekonomikë për çdo tender që zhvillohet. Si e ka vlerësuar kryetari Dredha kapacitetin financiar të kësaj kompanie, kur nuk ka përgatitur akoma bilancin e vitit 2023.
Theksojmë se në 29 mars 2024 është emëruar nga ortakët shoqëria audituese, por kanë kaluar 3 muaj dhe akoma nuk janë depozituar pasqyrat financiare të vitit 2023 (shih dokumentin më poshtë).
Një tjetër fakt që bie në sy është se këto materiale nuk do të bëhen me furnizim paketë, por çdo muaj nga një pjesë. Epo, kompania që ka fituar është e zënë, sepse në të njëjtën kohë vazhdon një kontratë për këto materiale të lidhur me bashkinë Patos në 11 dhjetor 2023 me afat 1 vit.
Urojmë që Dredha të mos organizojë herë tjetër tendera si ky, pasi do të shtohen rastet e dyshuara për korrupsion dhe do t’i bashkohet kolegëve që kanë zënë radhën në dyert e SPAK.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post