Ministri i ri i Ekonomisë dhe Financave e ka nisur punën në këtë institucion me firmosjen e një afere abuzive. Ditën e sotme është publikuar në Buletinin e Agjencisë së Prokurimeve Publike tenderi me objekt “Blerje pajisje për kabinetet SHMT & Elektrike & Elektronike për repartet e praktikave në shkollat e Aftësimit Profesional”. Prokurimi është organizuar fillimisht nga ish-ministrja Delina Ibrahimi, por e ka çuar deri në fund Mete.
Sipas dokumenteve, për këtë tender kanë shfaqur interes 4 firma, po pjesëmarrja e tre prej tyre ka qenë thjesht për fasadë, sepse fituesi ishte paracaktuar.
Fitues i paracaktuar!
“BAJRO BROS SHPK” është një nga firmat e cila shfaqi interes por më pas nuk paraqiti një vlerë për furnizimin. Ndërsa dy firmat e tjera, edhe pse kishin ofertë më të lirë, u skualifikuan nga gara menjëherë. Kështu kontrata mbeti në duart e firmës LIGUS SHPK, e cila është në pronësi të Erion Muçajt – 50% dhe Amarilda Çelajt – 50%.
Në fakt, ata i zotërojnë aksionet de jure, sepse në të vërtetë strumbullar i kësaj firme vazhdon të jetë i afërmi i një zyrtari të lartë të qeverisë.
Bëmat e Ervin Metes
Kjo aferë me tenderin në fjalë është një nga bëmat e vogla që bën ministri Mete, sepse ai është përfshirë edhe në skandale të tjera. Ervin Mete ka qenë më herët zv.ministër i Financave në kohën kur institucioni drejtohej nga Arben Ahmetaj.
Pas largimit që aty dhe emërimit tek AMF-ja, mete përveç Alda Klosit, ish-shefes së kabinetit të Ahmetajt, që e mori drejtoreshë në AMF, kishte ‘strehuar’ aty edhe nëndrejtoreshën Mimoza Kaçi. Emri i kësaj të fundit mbeti peng për shumë kohë dhe u miratua nga Kuvendi vetëm pas emërimit të Ahmetajt si zv.kryeministër. Pjesë interesante e kësaj historie është edhe një çështje e largët që daton në vitin 2004, shumë kohë përpara se Ervin Mete të ishte pjesë e rëndësishme e administratës.
Asokohe, Bilbil Mete, babai i Ervin Metes hetoi dosjen ‘Hermes’ ku Arben Ahmetaj, dyshohej për abuzime të forta me skemën e impulseve të Albtelekomit.
Në përfundim Bilbil Mete e pushoi çështjen, teksa sot ‘të besuarat’ e Ahmetajt strehohen në institucionin ku i biri, Ervin Mete, është Drejtor i Përgjithshëm. Nga këto të dhëna rezulton se, Autoriteti i Mbikëqyrjes Financiare (AMF) ku Ervin Mete ishte drejtor i Përgjithshëm Ekzekutiv është kthyer në strehë të ish-vartëseve e zyrtareve të administratës të lidhura me Ahmetajn.
Lexo edhe:Tenderi 350 mln lekë për kazanë plehrash, Emirjana Sako ia jep pa garë gruas së Afrim Qendros
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post