“Maqedonia e Veriut duhet të ketë vend të merituar në tavolinën e vendeve anëtare të BE-së”, kështu ka deklaruar përfaqësuesi special i SHBA-së, për Ballkanin Perëndimor, Gabriel Escobar, pas takimit që zhvilloi sot në Shkup me ministrin e Jashtëm, Bujar Osmani.
Ai tha se, SHBA do të vazhdojë të mbështesë përpjekjet e Maqedonisë së Veriut në procesin e integrimeve evropiane, si dhe vazhdimin e procesit të reformave që ajo të bëhet realitet.
“Nuk kemi vetëm partneritet, kemi miqësi, aleancë që e marrim me shumë seriozitet pasi nuk ndajmë vetëm ndajmë interesa të përbashkëta por ndajmë vlera. Mbështesim integrimin e fortë për integrimin e shpejtë të shtetit tuaj në BE. Ne jemi duke punuar me partnerët tanë në BE që ta bëjmë të mundur një gjë të tillë shumë shpejtë. Pajtohemi të gjithë së Maqedonia e Veriut është pjesë e Evropës, kulturalisht, historikisht, ekonomikisht, prandaj dhe ju duhet të keni një karrige në tavolinë”, tha Escobar në konferencën e përbashkët për media me Osmanin.
Ai po ashtu, shprehu falënderim për partneritetin e SHBA-së me Maqedoninë e Veriut, duke theksuar se, ajo nuk është vetëm partneritet, por miqësi dhe aleancë.
“Ne ndajmë vlera të përbashkëta të cilët janë në themelet e strategjisë sonë të vlerave të ndara. E shpreh falënderim tonë të Maqedonisë së Veriut për mbështetjen e vazhdueshme dhe përkushtimin në NATO”, shtoi Escobar.
Ndërkohë, Osmani tha se, SHBA luan rol kyç në stabilitetin e RMV-së dhe se së bashku, siç shpreh ai “kemi transformuar shtetin tonë dhe i kemi përmirësuar raportet tona me fqinjët”. Ai tha se, SHBA ka ndikuar në ruajtjen e demokracisë e qetësisë së shtetit prej pavarësimit dhe se është i bindur se do të ndihmojnë seriozisht edhe për tejkalimin e mosmarrëveshjes me Bullgarinë.
Discussion about this post