Deputeti demokrat dhe anëtari i Komisionit të Rithemelimit, Edi Paloka ka dhënë një deklaratë për mediat duke komentuar përplasjet mes Sali Berishës dhe Enkelejd Alibeaj.
Nga selia blu, Paloka tha se Alibeaj po ndjek agjendën e Ramës në Kongres, ndërsa shtoi se ndonëse ai është i shkarkuar nga Kuvendi i 11 dhjetorit, e pranuan për të mos shkaktuar përçarje në parti.
“Për fat të keq është një mbledhje grupi, që drejtohet nga një njeri që vijon me agjendën e Kongresit të PS. Enkelejd Alibeaj vjen dhe e fillon mbledhjen e grupit me agjendën e Edi Ramës. Unë nuk e di si mund të flitet për bashkim, kur Alibeaj thotë Berisha dhe gjysma e deputetëve janë të shkarkuar. Ai ka shkelur të gjitha parametrat që i lejohen një kryetari grupi, ai s’mund të jetë se është shkarkuar nga Kuvendi. Në statutin e PD është e qartë që vendi i kryetarit është paralel me të nënkryetarit, nga i cili Alibeaj është shkarkuar. Fakti që e pranuam Alibeajn ishte që të mos kishim përçarje. PD e drejton Komisioni i Rithemelimit”, tha Paloka.
Kujtojmë se në mbledhjen me dyer të mbyllura në PD, Alibeaj e ka quajtur Berishën pushtues, ndërsa ky i fundit i ka kërkuar dorëheqjen pas ankimimit në Gjykatë të Kuvendit të 11 dhjetorit.
Discussion about this post