Qytetarë dhe aktivistë janë mbledhur këtë të mërkurë para ambienteve të SPAK, ku po dorëzojnë librin “Albanian Files”, i firmosur një ditë më parë nga pjesëmarrësit në protestën e zhvilluar në shesh.
Protestuesit përsëritën se kërkesa e tyre kryesore mbetet dorëheqja e kryeministrit Edi Rama.
Sipas tyre, ky libër është arma e krimit me të cilin Rama ka shkatërruar Shqipërinë.
Po ashtu ata paralajmërojnë se do të bëjnë edhe një kallëzim.
“Në atë libër janë projektet që një pjesë janë ndërtuar, disa të tjerë do të ndërtohen. Aty është edhe projekti i Zvërnecit që në vitin 2022, ndërkohë që Edi Rama tha se nuk ka projekt. Është arma e krimit me të cilit Rama ka shkatërruar Shqipërinë”, tha një prej aktivisteve.
Aktivistja Sidorela Vatnikaj deklaroi para SPAK se libri “Albanian Files”, i firmosur nga protestuesit, përmban 523 projekte, të cilat sipas saj janë të ndërtuara, në proces ndërtimi ose të planifikuara për t’u realizuar.
Vatnikaj tha se dokumenti tregon shmangien e konsultimeve dhe pretendoi se ligji 2424 është miratuar në lidhje me projekte që ishin parashikuar më herët.
Aktivistja kërkoi që hetimet të vijojnë deri në fund, duke theksuar se drejtësia duhet të jetë e njëjtë për të gjithë, pavarësisht pushtetit.
“Në këtë libër gjenden 523 projekte, disa të ndërtuara, disa në ndërtim e sipër dhe disa të tjera në plan për tu ndërtuar. Në këtë libër del qartë se Rama ka shmangur konsultimin. Në këtë libër del qartë se ligji 2424 është një ligj i miratuar për shkak të projekteve të ndryshme që gjendjen në këtë libër vite më parë se të ndryshohej ligji.
Ne jemi këtu për ti dhënë SPAK se ka mbështetjen tonë për veprimet e deritanishme. Ne nuk jemi për drejtësi popullore, por ne kërkojmë një shtet të së drejtës ku kryeministri të trajtohet dhe hetohet si të gjithë qytetarët. Kërkojmë drejtësi deri në fund dhe drejtësi për të gjithë pavarësisht pushtetit momental”, tha aktivistja Sidorela Vatnikaj.
Discussion about this post