Ismail Elezi, ish-drejtues policie, ka bërë sot një deklaratë të fortë ndaj kryeministrit Edi Rama. Në një intervistë televizive ai ka folur në lidhje me atentatin e ndodhur dje në mbikalimin e Fushë-Krujës, ku mbetën të vrarë shtetasit Brilant Martinaj, Diklen Vata dhe Besmir Hoxha. Sipas tij, atentati më 3 viktimat ka qenë një nga më të rëndat e viteve të fundit, ndërsa tha se krimi stimulohet dhe nga deklarata e famshme e Edi Ramës që “kriminelët të hanë kokën me njëri tjetrin”.
“Unë mendoj se ngjarja e djeshme është mjaft e rëndë, nëse do ta shohim në aspektin e ruajtjes së rendit dhe sigurisë, unë mendoj se është sfiduar shteti, krimi ngre dorë, thotë që do të godasë dhe godet. Gjenden dy makina të djegura njëra në vendin e ngjarjes, ku u gjetën dhe dy kufoma, dhe një jashtë saj, iu shpreh ngushëllimet familjaret, dhe gjendet një makinë e djegur, ku janë gjetur 3 armë. Krimi sa vjen dhe sofistikohet, strukturat janë jashtë loje.
Sot në këtë ditë që ne flasim, kur e gjithë struktura e policisë së shtetit, ka kaluar në përforcim për sezonin veror, është një aks që frekuentohet çdo ditë nga mijëra njerëz. Ta shohësh në aspektin vizual, do çuditesh që ndodh ngjarja, dhe nuk ka një patrullë policie. E keqja te ne është se del i pari i vendit, dhe thotë që të hanë kokat me njëri tjetrin, kjo histori do të vazhdojë. Unë nuk thashë që policia po i lë që të vriten me njëri tjetrin, pasi unë jam i bindur që në polici ka persona të përkushtuar, por dalja e të parit të shtetit në një deklaratë të tillë, thjesht sa e stimulon krimin”, u shpreh ai.
Ish -drejtuesi i policisë i kërkoi Gledis Nanos që të bëjë presion në qeveri, në mënyrë që të rriten pagat e efektivëve. Elezi tha se është e pafalshme që në një aks të tillë rrugor të mungojnë patrullat e policisë, dhe t’iu jepet mundësia që të qarkullojnë lirshëm persona me armë dhe me rekorde kriminale.
“Punonjësi i policisë ka ardhur një moment që mezi po nxjerr muajin, një polic që përballet me ngjarje të ndryshme kriminale, nga vjedhja e energjisë te vrasjet, përdhunimet, plagosjet, e dini ju që një punonjës i rolit bazë nuk paguhet më shumë se 600 mijë lekë të vjetra. Gjej rastin ti bëj thirrje drejtorit të policisë që të ndërhyjë sa më shpejt në qeveri, dhe të kërkojë rritjen e rrogave për punonjësit e policisë. Do shkojmë keq e më keq, rri një kontenier në port me ditë me radhë dhe hiqen 49 arka, ndodh që njerëzit në policinë e shtetit duhet të ndërgjegjësohen”, u shpreh Elezi.
Discussion about this post