Në Tetor të vitit 2019, kryeministri dhe njëkohësisht kryesocialisti Edi Rama, deklaroi: “Kemi 50 përqind të këshillave bashkiak me gra dhe vajza, 60 përqind e administratës publike janë gra dhe vajza dhe kjo do të thotë që minimalisht kemi 60 përqind të administraës të pakorruptueshëm, pasi gratë dhe vajzat korruptohen më pak se burrat”.
Ujërat kanë kaluar nga ajo kohë dhe tashmë, perceptimi se gratë dhe vajzat e Rilindjes janë po aq të korruptueshme sa edhe burrat “rilindas” është më i fortë se kurrë.
Në pak muaj të fundit, disa grad he vajza, me poste të rëndësishme shtetërore dhe qeveritare, kanë rënë në pranga, kryesisht për korrupsion, por edhe në ndonjë rast për trafik droge.
Alda Klosi
Serinë e prangave për gratë dhe vajzat e Rilindjes e hapi Alda Klosi. Një ish-zyrtare e rëndësishme, e punësuar gjithnjë pranë ish-zv.kryeministrit Arben Ahmetaj, si anëtare e kabinetit të tij, Klosi raportoi në mes të Dhjetorit 2022 se pastruesja i kishte vjedhur rreth 120 mijë euro në shtëpi.
Këto shuma, sipas saj, ishin mbledhur nga familjarët e saj për të ndihmuar xhaxhain që ishte i sëmurë në Shtetet e Bashkuara të Amerikës.
Hetimet e Prokurorisë së Tiranës dhe të Policisë zbuluan rreth 500 mijë euro në shtëpinë e pastrueses Rozeta Dobi, e cila u arrestua së bashku me djalin e saj.
50-vjeçarja Dobi, e cila nuk e mbajti lehtë burgun, u hap para hetuesve, duke thënë se vjedhja nuk ishte reale. E gjithë historia ishte një inskenim, i ideruar nga punëdhënësja e saj, Alda Klosi, për të fshehur shumat e parave dhe për t’i siguruar nga bashkëshorti i zyrtares, me të cilin ishte në proces divorci.
Hetimet morën një rrjedhë tjetër dhe prokuroria e Tiranës urdhëroi arrestimin e Alda Klosit, nën dyshimet e “fshehjes së pasurisë”.
Erisa Fero
Pak ditë më parë, Gjykata e Lartë refuzoi lirimin nga qelia të Erisa Feros, specialistja 28-vjeçare e Agjencisë Kombëtare të Shoqërisë së Informacionit (AKSHI), e arrestuar për trafik droge nga Shqipëria drejt Maqedonisë.
Ajo u arrestua në flagrancë nga Policia në fund të dhjetorit 2022, në aksin rrugor Qafë Thanë-Pogradec, duke transportuar mbi 30 kilogramë lëndë narkotike kanabis sativa.
Erisa Fero ishte nën mbikqyrjen e Policisë prej disa javësh. Ajo dyshohet se siguronte lëndën narkotike në Shkodër dhe, nëpërmjet bashkëpunëtorëve të saj, e kalonte në Maqedoni.
Sipas të dhënave hetimore, rezulton se ajo, sa herë që ndalohej nga policia në drejtimin e mjetit, përdorte dokumentin e punësimit pranë AKSHI-t për të shmangur kontrollet.
Etleva Kondi
Zonja Kondi, ish-zyrtare e lartë në Ministrinë e Ekonomisë gjatë kohës që e drejtonte Arben Ahmetaj, ka pasur një rol thelbësor në përgatitjen e kontratës koncesionare për ndërtimin e impiantit të mbetjeve në Elbasan.
Etleva Kondi tashmë është e arrestuar dhe e marrë e pandehur nga Struktura e Posaçme Anti-Korrupsion (SPAK), e akuzuar se është përfshirë në korrupsion dhe shpërdorim detyre.
Të dhënat e siguruara nga dosja hetimore e SPAK-ut tregojnë se ajo ka pasur rol vendimtar në përgatitjen e dokumentacionit të koncesionit dhe “dorëzimin” e kontratës 28 milionë euro tek kompania “Albtek Energy”, me pronare zyrtare Stela Gugallja, por me pronar faktik bashkëjetuesin e saj, Mirel (Klodian Mërtiri).
Në këtë histori është përfshirë edhe biznesmeni Klodian Zoto. Etleva Kondi i drejtohej këtyre dy personazheve me termin “Klodër”.
Në datën 26.08.2014 shtetasja Etleva Kondi i ka dërguar një e-mail të pandehurit Klodian Zoto, bashkëlidhur të cilit është folderi me emrin “Bashkia Elbasan” ku ndodhet një shkresë draft e përgatitur në emër të Bashkisë Elbasan, drejtuar shoqërisë “Albtek Energy” sh.p.k, në përgjigje të shprehjes së interesit për trajtimin e mbetjeve urbane të depozituar në Bashkinë Elbasan.
Përveç draftit të shkresës, shtetasja Etleva Kondi i ka shkruar të pandehurit Klodian Zoto si më poshtë:
“Klodër…. kini parasysh si vijon:
– së pari, Bashkia Elbasan duhet të miratojë këtë konçension në Këshillin Bashkiak. (nuk jam e sigurtë para apo pas shkresës që mund t’ju nisë juve).
– së dyti, duhet të krijojë një komision të dhënies së konçensionit që, pasi të ketë bërë këtë shkresë, do t’ía bëjmë gati ne (në ligj parashikohet që mund të marrin ekspertë të fushës, që kështu mund të jem edhe unë me ndonjë kolege)..”.
Joana Duro
Sekretarja e Përgjithshme e Ministrisë së Shëndetësisë, Joana Duro, u arrestua në flagrancë pak ditë më parë, pasi u kap me 330 mijë lekë të reja në duar, të dhëna nga kompania “Dricons”, si shpërblim për dhënien e një tenderi supervizimi.
Ky është dyshimi i SPAK-ut, i cili udhëhoqi hetimin, ku u arrestuan krahas Duros, edhe një zyrtare tjetër shtetërore, Laura Sheto, si edhe dy përfaqësues të kompanisë “Dricons”.
Lajmi për arrestimin e zyrtares shumë të lartë të Ministrisë së Shëndetësisë, Joana Duro, u dha nga vetë kryeministri Edi Rama, para se informacioni të bëhej publik nga Policia apo Prokuroria e Posaçme.
Joana Duro dhe Laura Sheto u vendosën nën masën e “arrestit me burg” nga Gjykata e Posaçme, ndërkohë që Sekretarja e Përgjithshme e Ministrisë së Shëndetësisë ka mohuar akuzat.
Zonjat e Vangjush Dakos
Në fillim të kësaj jave, Prokuroria e Posaçme urdhëroi arrestimin e ish-kryetarit të Bashkisë së Durrësit, Vangjush Dako.
Ai dyshohet se ka shpërdoruar detyrën në dhënien e lejes së ndërtimit për një pallat në vitin 2011.
Në dosjen e hetimore rezultojnë të përfshira edhe të paktën tre zonja, të cilat kanë mbajtur më herët funksione zyrtare në Bashkinë e Durrësit, gjatë kohës që drejtohej nga Dako.
Ato janë Meri Selimi Ferzilet Hajdëri dhe Diana Dedja. Për tre zonjat, Gjykata e Posaçme ka caktuar masën e sigurimit “arrest në shtëpi”.
Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post