Aktivistja Etleva Merko, në fjalën e saj nga protesta e 80 që po mbahet para Kryeministrisë, është shprehur se kryeministrin Edi Rama tashmë nuk e duan më as socialistët, dhe sipas saj kreu i qeverisë nuk do të arrijë të marrë më as votat e tyre.
Ajo ka shtuar se problemet me të cilat përballen qytetarët janë të shumta dhe të pa imagjinueshme për vitin 2026, ku banorët e Sarandës nuk kanë drita dhe ujë.
“Më lejoni që t’u falenderoj që pavarësisht ditëve të nxehta, ju ia keni dalë. Ne do vazhdojmë të bashkuar deri sa Rama të largohet.
M’u desh të shkoja në qytetin tim Delvinë, u ndesha me dy realitete të kundërta. Ndërkohë që Bido festonte në qendër, një lagje tjetër e Delvinës ishte pa drita.
Pas dy ditësh në fshatin e Vanës, në 2024-tën, kjo ura është rindertuar me taksa publike dhe dje ura ishte prishur. Se ku shkojnë këto taksa, nuk dihet. Pak më larg është Saranda, qyteti bregdetar që pret çdo vit turistë.
Qytetarët e Sarandës nuk kanë drita, as ujë. Para këtij mandate, Rama në Sarandë premtoi 24 orë ujë, tha se depozitat nuk do jenë në taracatat e ndërtesave. Jemi në 2026 dhe Saranda vuan për ujë. Kushdo që e ka vizituar Sarandën, i ka parë problematikat. Këta nuk duan arsim dhe dije, por duan vetëm të ndërtojnë. Ky është pushteti i krimit. Ti që mendon që vjen në pushtet me votat e socialistëve, mendon se të duan sërish. Unë të them se ata nuk iu duan më”, tha aktivistja Etleva Merko.
Discussion about this post