Kualifikueset për kampionatin europian janë gjithmonë më një element kurioziteti brenda tyre. Zakonisht në këtë raund nuk ka surpriza, megjithatë befasitë kanë ndodhur herë pas here.
Përveç asaj që sot konsiderohet main-eventi i mbrëmjes, sfida Francë-Holandë, sonte zbresin në fushë, edhe disa nga kombëtaret e tjera të Europës që konsiderohen si favorite për triumfin final.
Në 18:00, Bullgaria dhe Mali i Zi ndeshen në Sofia me objektiv, nisjen sa më mbarë të fushatës eliminatore.
Në 20:45 do të jetë radha e pjesës tjetër të takimeve.
Belgjika e trajnerit të ri Tedesco dhe pa Hazard të tërhequr nga impenjimet ndërkombëtare kërkon triumfin në Suedi përballë vendasve të legjendës Zlatan Ibrahimoviç.
Në grupin E, ku ndodhet kombëtarja shqiptare, Republika Çeke dhe Polonia, pritet të dhurojnë spektakël në atë që është ndeshja më e fortë e grupit. Sfida tjetër e këtij grupi është ajo mes Moldavisë dhe Ishujve Faroe.
Greqia pritet të mos ketë probleme përballë Gjibraltarit modest në sfidën që do të luhet në Victoria Stadium.
Austria e David Alabas do përballet në Ernst Happel me Azerbajxhanin e Gianni De Biasit, i cili do kërkojë të përsërisë suksesin që arriti në 2015, me Shqipërinë edhe pse duhet thënë se skuadra që ka në dispozicion nuk jep shumë optimizëm.
Takimi që plotëson mbrëmjen e 24 marsit është ai mes Serbisë dhe Lituanisë. Ekipi i Stojkoviç do kërkojë të nisë me këmbë të mbarë eliminatoret në një grup ku është favorite për të shkuar në fazën finale.
Discussion about this post