Spanja ka siguruar biletën e finales, pas triumfit ndaj Ukrainës, në gjysmëfinalen e dytë të UEFA EURO U21, që po zhvillohet në Gjeorgji dhe Rumani.
Në sfidën e luajtur në Bukuresht të Rumanisë, spanjollët, nuk hasën shumë vështirësi, teksa zhvlerësuan avantazhin fillestar, të europiano-lindorëve, duke fituar me shifrat 5-1.
Takimi nisi në mënyrën më të mirë për Ukrainën, me “verdheblutë” që kaluan në epërsi, në minutën e 13’, me anë të Bondarenko.
Megjithatë, njësoj si në takimin e fazës në grupe, mes dy kombëtareve, Spanja shfrytëzoi amnezitë në mbrojtjen e kundërshtarit, për të barazuar shifrat, në minutën e 17’, falë sulmuesit Ruiz.
Iberikët, u hodhën në sulm, për të gjetur golin e epërsisë, duke ia arritur qëllimit, në minutën e 24’, me anë të lojtarit të Athletic Bilbao, Oihan Sancet.
Ukraina tentoi, në të gjitha mënyrat për të barazuar rezultatin, por pa arritur që të kërcënojë, portën spanjolle. Me avantazhin 2-1 të Spanjës, u mbyllën 45 minutat e para të takimit.
Në pjesën e dytë, Spanja zbriti më e qetë në fushë, duke administruar si duhet avantazhin e akumuluar gjatë fraksionit të parë, pavarësisht disa sulmeve të Ukrainës.
Në të 54’ minutë, “La Furia Roja” hipotekoi biletën e finales, me Blancon, që realizoi falë një goditje të fuqishme, nga brenda zonës.
Spanja nuk u mjaftua me tre golat e shënuar, duke kërkuar edhe golin e katërt të cilin e gjeti në minutën e 68’, me Oroz, i cili goditi saktë nga jashtë zone, duke realizuar një gol spektakolar.
10 minuta më vonë, iberikët kompletuan manitën, duke shënuar me anë të Gomez, një gol që tregoi dhe një herë se spanjollët janë skuadra që përbën rrezik për të gjithë.
Për ukrainasit, u bë e pamundur që të përsërisnin mrekullinë, si ndaj Francës, duke u eliminuar, nga ky turne.
Spanja, në finalen e 8 korrikut, do të ketë një duel ëndrrash, përballë Anglisë, një sfidë mes dy perandorive që kanë një rivalitet të madh me njëri-tjetrin, për shumë arsye, jo vetëm sportive./m.b /gijotina.com
Discussion about this post