Euro2024, ja sa përfiton kombëtarja nëse kualifikohet

Në dy përballjet e fundit, atë ndaj Çekisë dhe Polonisë, kombëtarja shqiptare mori 4 pikë, ndërsa renditet e para në Grupin E.

Në Pragë, kuqezinjtë u ndalën në barazimin 1-1, ndërsa në Air Albania fituan 2-0 përballë polakëve.

Pas këtyre rezultateve janë rritur shpresat që Shqipëria të jetë pjesëmarrëse në Euro 2024. Por për të arritur deri në kompeticionin më të rëndësishëm futbollistik europian, kuqezinjtë duhet të luajnë edhe 3 takimet e mbetura, Çekisë, Moldavisë dhe Ishujve Faroe, si 3 finale.

Europiani i shumëdëshiruar vlen miliona.

Janë plot 9.25 milionë euro që do të shkojnë në arkat e FSHF-së nëse Sylvinho dhe ekipi që ai drejton na dërgojnë në Euro2024.

Kjo shumë jepet nga UEFA për çdo skuadër që arrin fazën e grupeve. Në këtë mënyrë FSHF-ja do të mbushte arkat si rrallë herë më parë.

Shumat që fitojnë skuadrat nga kualifikimi në grupe deri te fituesi i Euro 2024:

9.25 milionë euro për cdo ekip që merr pjesë në grupe.

1.5 milionë euro për çdo fitore në grupe dhe 750 mijë euro vlen një barazim.

2 milionë euro për çdo skuadër që kalon në fazën e 1/16-tave.

3.25 milionë euro për çdo ekip që prek çerekfinalen.

5 milionë euro për çdo kombëtare që kualifikohet në gjysmëfinale.

7 milionë euro për finalistin që humbet

10 milionë euro për fituesin e Euro 2024.