Eurobondi i ri para zgjedhjeve/ Borxhi publik më 2025 shkon në 14,5 miliardë euro

Disa borxhe të vjetra do marrin këstin e fundit në vitin 2025, por të tjera të reja do të shtohen në bilancet e shtetit. Që në nisje të vitit qeveria planifikon të marrë 650 milionë euro në tregjet e huaja, që do të përdoret për të larë borxhet aktuale dhe për shpenzime të tjera në mbështetje buxhetore.

Për vitin 2025 borxhi planifikohet të jetë 14.5 miliardë euro, ndërkohë është parashikuar të shlyhen mbi 1 miliardë euro borxhe të vjetra.

Ministria e Financave parashikon tkurrje të borxhit publik vitin e ardhshëm, edhe pse planifikohet të merren 1.1 miliardë euro borxhe të reja në tregun e huaj e të brendshëm.

Përveç borxhit të jashtëm Ministria e Financave ka planifikuar të marrë edhe 500 milionë euro në tregun e brendshëm. Pra në total do të marrë më shumë se 1 miliard e 150 milion euro borxhe të reja, detyrime këto që do të shtohen në një kohë kur ende interesat nuk janë stabilizuar, dhe pritet të luhatet në vlerat e këtij viti.

Nga ana tjetër në 2025-ën do të mbyllet kësti i fundit prej afro 400 milionë euro i eurobondit të vitit 2018, si dhe do të shlyhet kredia e Bankës Botërore prej 200 milionë euro.

Në buxhetin e vitit të ardhshëm janë planifikuar në total 1 miliard e 27 milionë euro ripagesa për borxhin e jashtëm, pa përfshirë interesat e tyre.

Në total borxhi publik për vitin e ardhshëm do të arrijë në 55.8% të Prodhimit të Brendshëm Bruto, nga 56.3% e pritshme për këtë vit. Sipas skenarit bazë të Ministrisë së Financave borxhi publik bruto pritet të bjerë në rreth 55% në vitin 2026 dhe të zbresë në rreth 48.5% në vitin 2031.

E përkthyer në vlerë viti 2025 planifikohet të mbyllet në vlerën 14 miliardë e 578 milionë euro, nga 14 miliardë e 491 milionë euro me rritje të lehtë prej 87 milionë euro. Edhe pse në vlerë borxhi vjen në rritje, në % ndaj Prodhimit të Brendshëm Bruto ai rezulton më i ulët, për shkak të rritjes së PBB-së me afro 1.2 miliardë euro vitin që vjen.

Në buxhet qeveria ka planifikuar 685 milionë euro shpenzime për interesat e borxhit të jashtëm dhe të brendshëm si dhe ka caktuar edhe një fond kontigjence për rreziqe që mund të vijnë nga rritje e interesave apo forcim të valutave të huaja në vlerën afro 58 milionë euro.