Eurodeputeti bullgar , Andrey Kovatchev, ka folur sot për negociatat dhe për çështjen që problemi mes vendit të tij dhe Maqedonisë së Veriut, por pengon integrimin e Shqipërisë.
Kovatchev e quan krejtësisht të papranueshme dhe hipokrite faktin, që disa shtete anëtare fshihen pas ngërçit midis Bullgarisë dhe Maqedonisë së Veriut për të mos hapur negociatat e anëtarësimit me Shqipërinë.
“Siç e kam kuptuar unë, të gjitha shtetet anëtare janë gati të fillojnë negociatat e anëtarësimit edhe me Shqipërinë. I vetmi pretekst që ato po përdorin, është që Shkupi dhe Sofja nuk janë gati me një zgjidhje. Atëherë pse trajtimi veç e veç i dy shteteve nuk është e mundur kur ata thonë që Shqipëria është gati? Më kuptoni drejt, unë nuk po gjykoj, nëse Shqipëria është gati me lirinë e shtypit, me reformën e drejtësie, me procesin e Vettingut dhe të tjera. Ka shumë çështje. Por, zyrtarisht, shtetet anëtare thonë që ju (Shqipëria) jeni gati, por na falni, se nuk i hapim dot negociatat për shkak të Bullgarëve. Kjo është krejtësisht hipokrite dhe nuk mund kurrsesi ta pranoj. Nuk mund të thuash: Jeni gati, por nuk mund të fillojmë për shkak të Bullgarisë. Së dyti, ne duam të shohim jo një non-paper, por një udhërrëfyes të dakortësuar nga të dyja palët në kornizën negociuese të Maqedonisë së Veriut me garancitë e nevojshme”, u shpreh ai.
Ndërsa për ngërçin me Maqedoninë e veriut ai tha se, cdo gjë varet nga Maqedonia e nga liderët politikë të saj.
