Europa League zhvilloi mbrëmjen e së enjtes dy ndeshjet e para gjysmëfinale. Në Francë Marseille dhe Atalanta barazuan 1-1 duke lënë gjithçka të hapur për ndeshjen e kthimit javës që vjen. Ndërkohë në Itali vendasit e Romës u mundën 0-2 nga Bayer Leverkusen.
Në “Olimpico” Roma ishte e pafuqishme kundër rekordmenëve të Bayer Leverkusen, me këta ta fundit që fituan 0-2 dhe janë me “një këmbë” në finalen e Europa League. Ndeshja për të besuarit e Xabi Alonsos u zhbllokua në minutën e 28-të nga Florian Wirtz. Talenti i “Aspirinave” përfitoi nga një gabim i mbrojtjes vendase dhe shënoi. Ndërkohë në pjesën e dytë Andrich shënoi një perlë që mund të jetë edhe goli më i bukur i Europa League, duke “vulosur” suksesin për gjermanët në aktin e parë. Në këtë duel nuk munguan nervat, me Granit Xhakën që u konfliktua me lojtarët vendas. Me këtë sukses, Leverkusen e çon në 47 numrin e ndeshjeve pa humbje këtë sezon, duke thelluar rekordin. Kujtojmë se dy javë më parë ata zyrtarizuan titullin e parë kampion në Bundesligë.
Pa fitues u mbyll raundi i parë i Marseille-Atalanta (1-1). Gianluca Scamacca zhbllokoi ndeshjen në minutën e 11’, por vendasit reaguan nëntë minuta më vonë, kur barazuan falë një goditjeje potente të kongolezit Chancel Mbemba.
Të enjten që vjen do luhen ndeshjet e kthimit për të mësuar edhe dy skuadrat finaliste që do luajnë më 22 maj në “Aviva Stadium” në Dublin, Irlandë.
Discussion about this post