Eurovizioni “i nxjerr kthetrat” Ronelës, Klaudia Pepa e prerë: Koreografia do jetë njësoj!

Performanca e këngëtares Ronela Hajati është fshirë nga faqja zyrtare e Eurovisionit.

Shkak për këtë është aluduar se mund të jetë koreografia e saj e cila është konsideruar shumë “provokative.”

Në lidhje me këtë lajm kanë folur dy nga artistët e ekipit shqiptar në “Eurovision”, stilisti Niko Komani dhe koreografja Klaudia Pepa.

Niko, tha se performanca e Ronela Hajatit është pritur mirë në Itali ndërsa sa i përket “fotove provokuese”, ai tha se është bërë më e madhe seç është dhe se impakti me publikun atje është shumë i mirë.

Nga ana tjetër, edhe Klaudia Pepa tregoi se kënga “Sekret” pëlqehet shumë, dhe konfirmoi se koreografia nuk do të ndryshohet.

“Dua të them që jam shumë e lumtur që jam pjesë e ekipit shqiptar. Kënga dhe Ronela si personazh pëlqehen shumë. Do doja shumë që koreografia të mbetet sekret, megjithatë do të jap disa detaje të vogla se si do të jetë. Jemi të lirshëm të japim mendimin tonë dhe ne nuk do të ndryshojmë asgjë. Do të japim mesazhet dhe idetë tona. Janë 4 djem, balerinë italianë dhe unë gjithashtu do të kërcej.”– tha koreografja.