Armando Sadiku ka njoftuar tërheqjen nga futbolli në moshën 35-vjeçare. Ish-sulmuesi i Kombëtares shqiptare zgjodhi të “varë këpucët në gozhdë”, teksa përmes një videoje të shpërndarë në profilin e tij në Instagram, komunikon vendimin më të vështirë të jetës.
“Faleminderit, futboll. Do të më mungosh”, shkruan Sadiku, i cili në sekuenca të shkëputura ndan disa çaste nga karriera e tij e spikatur dhe momente që lanë gjurmë për të në përvojën e lëvruar si profesionist.
Armando Sadiku do të kujtohet në fushë për momentet e paharrueshme që shënuan dhe historinë e lavdishme të Shqipërisë në arenën evropiane. Goli vendimtar i shënuar përballë Armenisë që kulmoi dhe me kualifikimin në Europianin e parë historik në Francë 2016, për të vazhduar me “emblemën” përballë Rumanisë në atë fitore 0-1, ndeshja e fundit e atij Europiani.
Sa i takon prezencave me Kombëtaren, ish-i kuqezi numëron 38 ndeshje dhe 12 gola, ndërsa nga sot e tutje do të mbulojë rolin e drejtorit sportiv te Bellinzona, klub zviceran.
Discussion about this post