Vullneti i Kryetarit të Bashkisë Tiranë, Erion Veliaj, po thyen çdo ligj antikorrupsion që ka lidhje me prokurimin e fondeve të buxhetit të shtetit. Në këtë vazhdë, i mbiquajturi Lali Eri i ka dhuruar 331 milionë lekë një biznesmenit të njohur për korrupsion. Ky fond justifikohet nga kryetari me planet për rregullimin e fasadave të godinave.
Paratë do të përdoren për bojatisje muresh tek ish-Blloku në qendër të Tiranës. Nuk mbahet mend se sa herë e ka “rregulluar” këtë zonë të vogël. Për këtë plan është hapur tenderi me objekt “Rikualifikimi urban i bllokut kufizuar nga rrugët “Sami Frashëri”, “Pjetër Bogdani”- ”Andon Zako Cajupi” dhe “Moskat”. Bëhet fjalë për zonën në foto, ku shihet se rrugicat janë të mbingarkuar me ndërtime që ka firmosur Lali Eri.
Në këtë projekt kryetari pretendon se do të bëhet rehabilitim i godinave dhe rrugicave. Në fakt, nga verifikimi që bëmë në terren, si në rrugicën afër Partisë së Lirisë (ish-LSI) edhe në pjesën fundore të lagjes, pra pranë shkollës “Edith Durham” kanë filluar të ndërtohen me shumicë pallate të reja. Për më tepë këto ndërtime bëhen shumë ngjitur me godinat ekzistuese. Në këtë zonë nuk ka nevojë për fasada të reja dhe asfalt, por për kanalizime të ujërave të zeza, pasi ato ekzistueset nuk e përballojnë dot këtë bum ndërtimesh në lartësi.
Nëse Veliaj quan këtë rehabilitim, ne ju garantojmë më fakte se shumë shpejt në këtë zonë nuk ketë më hapësirë për të lëvizur as këmbësorët, madje qiellin ta harrojnë se nuk do ta shohin më me sy.
Përtej kësaj, ky tender që bëhet thjesht për të mbushur arkën e një kompanie private, ka një sërë shkeljesh. Shohim se Open Data Albania i ka vendosur “Flamurin e Kuq”, për shkak se fituesi është shpallur pa garë fare. Kjo shenja tregon riskun e lartë të korrupsionit në tender.
Dokumenti tregon që janë dorëzuar 10 oferta për këtë prokurim, por sërish Veliaj ka zgjedhur t’i bjerë shkurt. Madje shohim se oferta e “RSM COMPANY” shpk me vlerë 225 milionë lekë dhe propozimi i “K.TURJA” shpk & “KEGLI-DURI” shpk me vlerë 240 milionë lekë ishin më të lira se ajo e fituesit dhe të paktën duhet të ishin kaluar në finale për të konkurruar. Por, stafi i Veliajt i ka skualifikuar për mungesë të disa dokumenteve. Kështu, duke mos iu lënë kohë të paraqesin materialet e kërkuara, siç e kërkon ligji, Veliaj ka nxituar dhe pa konkurrentë përballë ka shpallur fituese firmën “LIS KONSTRUKSION” shpk me ofertë 250 milionë lekë.
Kjo kontratë e dhuruar në shkelje të ligjit mbi prokurimet ishte si një lajm për rikthimin e firmës LIS KONSTRUKSION” shpk në botën e aferave korruptive me tenderët. Firma në fjalë është e njohur për të tilla gjëra dhe madje mban një dosje të zezë me numër të lartë të abuzimeve.
Abuzimet e Muratit
Kjo firmë dikur quhej “EURO-ALB” dhe është themeluar nga Bujar Murati në vitin 1999. Në vitin 2006, Murati ia kalon aksionet në masën 100 % bashkëshortes së tij, Doriana Muratit. Pas shkarkimit si drejtor prokurimesh dhe arrestimit, Bujar Murati, në dhjetor të vitit 2013, i rimerr sërish aksionet, tashmë përmes dhurimit nga bashkëshortja e tij.
Po le të flasim pak për të shkuarën e errët të Muratit, i cili shpërdoronte detyrën dhe vidhte para përmes firmës së tij.
Në vitin 2009, Murati mbante postin e drejtorit të përgjithshëm të prokurimeve publike në Ministrinë e Brendshme kur u arrestua për tenderin e uniformave të policisë, i paracaktuar për kompaninë “Gjergjefi”, me pronar Jani Gjergjefi. Në dhjetor 2009, gjatë operacionit ‘Prokurimi i fundit”, u arrestuan edhe pronari i kompanisë fituese Jani Gjergjefi, specialisti Redi Popescu, shef i prokurimeve në Gardën e Republikës Tahir Imami si dhe biznesmenët Artan Berberi dhe Agur Sadiku. Sipas prokurorisë dhe policisë, tre biznesmenët do t’u jepnin një pjesë të fitimit tre funksionarëve publikë, në këmbim të shpalljes fitues të tenderit. Bujar Murati, jo vetëm i shpëtoi dënimit, por në janar të vitit 2014 depozitoi një padi civile në Gjykatën e Tiranës, duke kërkuar dëmshpërblim për ditët e burgut.
Ndërkohë në vitin 2021 ai u arrestua me urdhër të SPAK për afera me tendera me ish-kryebashkiakun e Lushnjës Fatos Tushe dhe grupin e tij.
Theksojmë se pas arrestimit të dytë, Murati ia shtet sërish aksionet e kompanisë gruas së tij.
Kompania e Muratit ishe paracaktuar fituese tenderit abuziv me vlerë 24 milionë lekë për rehabilitimin e kanalit ujitës në Bitaj të Lushnjës. Sipas dosjes, kompania e Muratit e kishte fituar tenderin me dokumente të falsifikuara, me ofertë gati sa fondi limit, përmes përjashtimit arbitrar të kompanive të tjera, duke ndarë më pas një pjesë e të parave të tenderit sipas rolit në këtë aferë.
Për më tepër, punimet po i kryente një kompani tjetër. Abuzimi çoi në pranga kryebashkiakun e Lushnjes Fatos Tushe dhe 8 vartësit e tij, si dhe 2 biznesmenë.
Me sa shohim, Bujar Murati ia paska hedhur paq edhe me SPAK-un! Dhe tani i qenka rikthyer aferave, i ndihmuar nga Lali Eri, i cili ka grumbulluar në bashkëpunimet e tij të gjithë biznesmenët që janë kontingjent i korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post