Sektori i fasonëve vazhdon të vuaj më shumë se çdo sektor tjetër krizën që solli pandemia dhe gjatë këtij viti nuk ka arritur të kalojë kapacitete e 2020-ës. Nga të dhënat e raportuara në INSTAT evidentohet se, në janar-nëntor fasoneritë kanë eksportuar 846,4 milionë euro, ose rreth 63.3 milionë euro më pak se në të njëjtën periudhë të vitit 2019. Në këto kushte në raport me vitin e kaluar, ky sektor ka eksportuar 67.8 milionë euro më shumë, por mbetet shumë poshtë kapaciteteve të parakrizës. Ndërsa në zërin e importit, ka pasur rritje edhe në raport me vitin 2019. Sipas të dhënave nga janari në nëntor të këtij viti janë importuar 676.9 milionë euro nga 662.3 milionë euro që u importuan në 2019. Referuar këtyre shifrave, por edhe vështirësive konkret me të cilat po përballen çdo ditë fasoneritë, Këshilli i Investimeve thotë se kjo industri ka 10 sfida të mëdha përpara dhe që duhet mbështetje.
“Po mbyllet cikli i prodhimit, janë vjetruar pajisjet, forcimi i lekut ndaj euros ka rritur kostot, shtuar kostot e paketimit, tatimi i lartë mbi fitimin, kostot e transportit apo energjisë janë disa nga sfidat e listuar në një raport të Këshillit të Investimeve”, shprehet Këshilli i Investimeve.
Ndërsa thekson më tutje se, mundësitë e këtij biznesi janë të mëdha, por kërkohet mbështetje për rritjen e promovimit të prodhimit Made In Albania që ka standarde të reja. Po ashtu kërkohet të merren masa për rritjen e konkurrencës dhe një analizë e çmimeve nga produktet e importit.
Discussion about this post