Gjykata Kushtetuese ka caktuar 18 janarin e vitit të ardhshëm, si ditën kur kjo e fundit do të vendosë shkarkimin e Ilir Metës nga posti i Presidentit të Republikës.
Mandati i Metës si President përfundon në korrikun e vitit 2022, ndërkohë që shkarkimi i tij në Kuvend, me votat e mazhorancës u bë në qershor të këtij viti.
Partia Socialiste kërkoi shkarkimin e Metës me justifikimin se kreu i shtetit ka kryer shkelje të rënda kushtetuese. Në Kuvendin e Shqipërisë, deputetët votuan në favor të shkarkimit të Metës me 104 vota pro, shtatë kundër, dy abstenim dhe një fletëvotimi që ishte e pavlefshme.
Sipas ligjit, Gjykata Kushtetuese deklaron shkarkimin e presidentit kur vërteton fajësinë e tij, apo shkeljet kushtetuese që i ka nxjerrë raporti dhe kuvendi i ka votuar.
I pyetur gjatë ditës së djeshme mbi mundësinë e shkarkimit, Meta tha se ai do të qëndrojë në detyrë deri në fund të mandatit, dhe paralajmëroi qëndrimin e tij në politikën aktive.
Discussion about this post