Festuan me këngë e valle për arrestimin e Erion Veliajt, policia nis hetimin për prishje të qetësisë publike

Arrestimi i kryetarit të bashkisë së Tiranës, Erion Veliaj ka bërë që disa qytetarë të festojnë me këngë e vallë tek paraburgimi në “Mine Peza”.

Festa e tyre për arrestimin e Veliajt dhe shprehja hapur e mbështetjes për vendimin e Strukturës së Posaçme Antikorrupsion, duket se nuk i ka pëlqyer  policisë, pasi ka nisur hetimet për 8 qytetarë për prishje të qetësisë publike.

Blutë e Tiranës thonë se këta persona, përveçse kanë prishur qetësinë publike, nuk i janë bindur urdhrit të policisë për t’u larguar.

“Specialistët për Hetimin e Krimeve të Komisariatit të Policisë Nr. 3 referuan materialet në Prokurori ku nisi procedimi në gjendje të lirë për veprat penale “Prishja e qetësisë publike” dhe “Mosbindja ndaj urdhrit të punonjësit të policisë”, për shtetasit S. L., E. V., M. D., B. L., A. K., K. M., A. B. dhe A. K., pasi më datë 11.02.2025, rreth orës 00:30, në rrugën “Mine Peza”, kanë prishur qetësinë publike dhe nuk iu janë bindur urdhrave të punonjësve të Policisë, për t’u larguar”, tha Policia.