Kupa mbetet blu, Dinamo mposht Egnatian në finale

Dinamo është sërish kampione e Kupës së Shqipërisë, kjo pas fitores 3-2 me Egnatian në “Arenën Kombëtare”.

Sfida e luajtur në kryeqytet nisi me ritëm të lartë, ku rrogozhinasit mbetën me 10 lojtarë pas daljes me karton të kuq të Bakayokos në minutën e 10, kjo pasi shkaktoi një ndërhyrje të rëndë ndaj portierit Teqja, i cili u detyrua të linte fushën me ambulancë.

Dinamovitët përfituan nga epërsia numerike dhe kaluan në avantazh me Malomon në minutën e 23’ dhe pas 6 minutash, Bregu dyfishoi shifrat.

Në pjesën e dytë u rikthye baraspesha numerike në fushë, kjo pasi Malomo u ndëshkua me kartonin e dytë të verdhë për vonesa loje.

Buric rihapi sfidën në minutën e 81’, por pas tre minutash, ishte Mustapha që i dha goditjen e KO rrogozhinasve.

Në fundin e takimit, ishte Adjesa që shënoi golin e dytë për Egnatian, që në fund shërbeu vetëm si statistikë.

Dinamo kështu mbetet kampione në fuqi e Kupës, duke e fituar për të dytin vit radhazi këtë trofe.

DINAMO 3-2 EGNATIA

Malomo 23′, Bregu 29′, Mustapha 84′ / Buric 81′, Adjesa 90+3′

gijotina.com/