Gjashtë marrëveshje, gjashtë memorandume e pjesa tjetër protokolle dhe deklarata. Në 15 aktet e firmosura nga qeveria shqiptare me atë italiane, dominuan projektet me fokus tek mbrojtja dhe SIGURIA.
Përveç marrëveshjes për rinovimin e partneritetit ushtarak u firmos edhe për fuqizimin e industrisë ushtarake.
“Kemi dy marrëveshje gjigande që nënshkruhen mes dy kompanive shtetërore, KAYO dhe Fincantieri për prodhimin e anijeve ushtarake, dhe kjo është arritje domethënëse. Një tjetër marrëveshje e KAYO-s dhe kompanisë Leonardo e specializuar në teknologjinë ushtarake”, tha Vëngu nga Roma.
U firmos gjithashtu marrëveshja 30 mln euro për mbrojtjen civile për krijimin e të gjitha sistemeve të paralajmërimit të hershëm për të pasur dhe ne numrin evropian 112 ku të gjithë qytetarët mund t’i referohen për emergjenca.
Në prezencë të ministrave të Brendshëm të të dy shteteve, drejtuesi i Policisë Ilir Proda dhe Drejtori për Shërbimet Kundër Drogës, Giuseppe Spina firmosën memorandumin e Mirëkuptimit “Misioni kundër drogës”, që synon rritjen e bashkëpunimit operacional, lehtësimin e shkëmbimit të informacionit mbi grupet kriminale, forcimin e operacioneve dhe hetimeve të përbashkëta.
Siguria kibernetike, po ashtu ishte në fokus të takimeve dypalëshe. Një memorandum mirëkuptimi u firmos nga ministrja e Jashtme Elisa Spiropali dhe homologu italian Antonio Tajani
Realizimi i projektetit në mbështetje të neonatologjisë, në mbrojtje të fëmijëve dhe nënave ishte marrëveshja tjetër që u firmos në Romë. Por bashkëpunimi në fushën e shëndetësisë nuk ndalet këtu
Kemi rakorduar bashkëpunimin për ngritjen e Rrjetit Kombëtar të Onkologjisë, por edhe për Institutin Kombëtar të Onkologjisë në Tiranë, një bashkëpunim strategjik që vë bazat për të gjithë programin e ripërtëritjes së onkologjisë në Shqipëri. Një fushë tjetër shumë e rëndësishme që është e lidhur ngushtësisht me onkologjinë është edhe ajo e diagnostikës, dhe ky është një tjetër fokus që kemi në bashkëpunimin dhe në bisedat që bëmë sot me homologun Schillaci”, tha ministrja Sala.
Dy marrëveshjet e tjera ishin për bashkëpunim me Cassa Depositi e Prestiti, që është bashkëpunëtore e qeverisë në hartimin e ligjit për ngritjen e Bankës së Zhvillimit, si dhe do të ofrojë mbështetje teknike për ta bërë funksionale atë, pasi ka ekspertizë në këtë fushë, si një institucion financiar që ka luajtur rol të rëndësishëm në zhvillimin e ekonomisë italiane. Po ashtu Cassa Depositi e Prestiti do të ofrojë mbështetje financiare për rrjetin e transmetimit të energjisë eklektike në Shqipërinë veriore.
Kurse agjencia e Investimeve Shqiptare nënshkroi një memorandum mirëkuptimi me homologët italianë.
Ministrja e Ekonomisë dhe Inovacionit, Delina Ibrahimaj, theksoi rëndësinë e kësaj nisme për thellimin e bashkëpunimit ekonomik dhe për mbështetjen e bizneseve shqiptare në procesin e ndërkombëtarizimit.
“Italia ka qenë dhe mbetet partneri ynë strategjik më i afërt, investitori i parë dypalësh dhe ndërmjetësi kryesor ekonomik dhe institucional i Shqipërisë në rrugën drejt integrimit evropian. Marrëveshja AIDA-SIMEST përfaqëson një hap konkret drejt krijimit të një ekosistemi të integruar mbështetjeje për bizneset, duke nxitur inovacionin, digjitalizimin dhe rritjen e qëndrueshme”, u shpreh ministrja Ibrahimaj.
gijotina.com/
Discussion about this post