Blendi Gonxhja është i njohur për shpenzimet marramendëse që bën për projekte që shpesh herë janë haptazi shpërdorime dhe abuzime. Drejtori i DPSHTRR, pas harxhimeve për mikrofona, kufje dhe projektin e Formula 1, si prag festash që jemi, po kërkon të rregullojë fasadat e drejtorive të Transportit në disa qytete. Këtë herë paratë do të shkojnë për drejtorinë rajonale në Durrës. Tenderi është publikuar në faqen e Agjencisë së Prokurimeve, ku evidentohen një sërë shkeljesh. Bëhet fjalë për prokurimin me objekt “Rikonstruksion në DRSHTRR Durrës, rehabilitimi i sheshit dhe godinës së kontrollit teknik”. Do t’ju duket e habitshme, por për këtë proejkt do të shpenzohen 84 967 387 000 lekë.
Qindra milionë lekë për rregullim të ambienteve ekzistuese, por vetëm kane nevojë për lyerje dhe asfaltimin e sheshit. Pikërisht këtu nis abuzimi. Sepse nga dokumentet e publikuara vihet re se Gonxhja ka shpallur fituese kompaninë me ofertën më të shtrenjtë. Konkretisht, 3 kompani kanë dorëzuar ofertat me vlerë 140 milionë lekë më lirë. Por, famëkeqi Gonxhja i ka skualifikuar nga gara. Sipas arsyetimit, kompanitë nuk kanë dorëzuar formularët vetëdeklarimit, ose disa nga punonjësit e tyre janë në të njëjtën kohë punonjës edhe në një tjetër firmë.
Kështu, për 6 muaj punë, Gonxhja ka zgjidhur qesen dhe to t’i japë 840 milionë lekë firmës “Ergi Shpk”. Kjo është një kompani e njohur për afera të shumta korruptive, duke fituar tenderëve pa garë kryesisht nga Bashkitë Elbasan dhe Tiranë. Kujtojmë se “Ergi shpk” ka përfituar para edhe nga afera e Inceneratorit të Elbasanit. Bëhet fjalë për disa javë më parë, ku janë hedhur 169 milionë lekë nga Bashkia Elbasan, për të siguruar automjetet që do të përdoren për shpërndarjen e mbetjeve brenda landfillit. Në fakt tenderin e ka hapur “ECO ELB Sh.A”, por që varet nga kryebashkiaku i Elbasanit. Pjesëmarrës sipas dokumenteve, ishte vetëm “ERGI” sh.p.k. që është shpallur edhe fitues. Prej fundit të vitit të shkuar inceneratori i Elbasanit është sekuestruar nga SPAK pas hetimeve për korrupsion me koncesionin.
Porosi nga Sako
Rikonstruksioni i fasadës së DPSHTRR Durrës në fakt ka qenë koordinuar si porosi nga kryetarja e kësaj bashkie, Emiriana Sako. Me datë 21 korrik ajo ka bërë me dije se do të ketë disa ndërhyrje në godinën e DSHTRR-së. Përmes një njoftimi në “Facebook” Sako bëri me dije se do të zhvillohen ambiente moderne që të lehtësojnë edhe shërbimet për qytetarët. “Në këtë mënyrë qytetarët do të gjejnë aty mjedise komode dhe shërbime më cilësore. Përveç rikonstruksionit të qendrës projekti parashikon edhe rikualifikimin urban përreth, zgjidhjen e parkimeve dhe aksesit më komod për qytetarët”, shkruante ajo në korrik.
Sako parashikonte që këto ndërtime do të mbaronin pranverën e vitit 2023. Në fakt edhe në dokumentet e kontratës thuhet se punimet do të zgjasin rreth 6 muaj. Pra, do të përfundojnë në maj të vitit të ardhshëm. “Qendra e Kontrollit Teknik, DRSHTRR Durrës do të rikonstruktohet tërësisht duke u kthyer në një qendër moderne brenda pranverës së vitit të ardhshëm”, shkruante Sako. Dhe këtë kërkesë po ia “plotëson” Gonxhja.
Lexo edhe: Blendi Gonxhja i Transportit shpenzon 60 milionë lekë për mikrofona dhe skena
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post