Fitorja historike e Shqipërisë në Serbi, shpërthen Vuçiç: Nuk munda të flija nga trishtimi

Presidenti Serb Aleksandër Vuçiç ka komentuar ndeshjen e djeshme mes Serbisë dhe Shqipërisë, ku ekipi ynë triumfoi me rezultatin 1-0 në Leskovec.

Ai përgëzoi tifozët që ishin të pranishëm në stadium, duke thënë se ata e mbështetën ekipin serb gjatë gjithë kohës, dhe pse ishte duke humbur.

“Jam krenar për turmën e Leskovcit. Shikoni sa e vështirë është të brohorasësh kur humbet ndaj një kundërshtari të tillë ku nuk pret të humbasësh një ndeshje që është e vështirë, e tensionuar, në çdo aspekt. Turmë e Leskovcit, urime, njerëz,” tha ai, duke shtuar se nuk ishte në stadium për të mbështetur ekipin pasi ishte i lodhur: “Do ta qortoj veten që nuk munda të shkoja në ndeshje. E dua ekipin kombëtar serb dhe më vjen keq që nuk isha në ndeshje për të treguar dashurinë time për vendin tim, për trengjyrëshin tim. Si kur kryesojmë, ashtu edhe kur humbasim dhe kur fitojmë.”

Teksa komentoi rezultatin, Vuçiç theksoi se mbrëmë nuk ka fjetur gjumë fare, jo nga zemërimi, por nga trishtimi i asaj humbje që e cilësoi “të rëndë”.

“Nuk kemi lojtarë futbolli më të mirë se këta. Jemi mësuar të jemi gjithmonë më të mirët në gjithçka dhe të fitojmë. Nuk ishte mirë. Ekipi nuk ishte i përgatitur mirë. Ne u zhgënjyem me lojën. Humbja ishte e rëndë për ne. Nuk mund të flija për shkak të trishtimit, jo për shkak të zemërimit”, tha Vuçiç.

Pavarësisht asaj që thotë Vuçiç, goli i Rey Manajt “tërboi” serbët që ishin në stadiumin “Dubočica”, të cilët brohoritën në kore thirrje provokuese si “Kosova është zemra e Serbisë” dhe “Vrite, vrite shqiptarin”.