Detaje tronditëse janë zbardhur nga ngjarja e ndodhur mbrëmjen e djeshme ku zjarri në një banesë në Dropull u mori jetën dy të moshuarve. Banorët e fshatit të cilët kanë qenë dëshmitarë të kësaj ngjarjeje të rëndë, shprehen se në momentin kur kanë parë flakët janë përpjekur të ndihmonin të ndjerët, por ishte e pamundur, pasi drutë që ata mbanin në shtëpi kanë favorizuar tej mase flakët. Ata thonë se flakët kishin arritur në 30 metra dhe ishte pothuajse e pamundur ndërhyrja.
“Rrezikoheshin shtëpi të tjera. Me kova uji shpëtuam banesën poshtë që të mos merrte flakë. Nuk kishte asnjë mundësi për t’u futur brenda. Flakët arrinin në 30 metra. Burrin e gjeta te pragu i derës, gruas i kishte rënë tavani e kishte zënë poshtë”, tregon një banor.
Ata kanë dhënë detaje pak para se burri dhe gruaja e moshuar të digjeshin brenda, duke thënë se gruan e moshuar e kishte zënë tavani poshtë, ndërsa burri është përpjekur të largohet por në prag të derës flakët e kanë përpirë, duke mos mundur që asnjëri prej të dyve të mbijetojnë. Një banore thotë se çifti i bashkëshortëve ngrohej me sobë druri dhe mund të ketë qenë gazi shkaku i zjarrit.
“Dëgjuam shpërthim. Ishin bombola gazi a çfarë ishin, nuk e dimë. Ishte ora shtatë e darkës, nuk e vumë re që në fillim, ishim brenda. bënë dritat dy tre herë shkëputje. Flaka kishte shkuar në qiell. Nuk guxonte njeri të hynte. Ra tavani, u shemb, gruan e gjetëm poshtë, në kat të parë. Ishte ngjarje shumë e rëndë. Nuk kemi fjetur gjithë natën”.
Hetimet për ngjarjen vijojnë ende, ndërsa banorët do të kujtojnë gjatë tragjedinë, teksa shikojnë inertet dhe hirin e mbetur nga zjarri masiv në fshatin e tyre
Discussion about this post