Deputeti i Partisë Demokratike, Flamur Noka, është shprehur se Kamza ka vuajtur më shumë se çdo bashki tjetër korrupsionin e qeverisë së kryeministrit Edi Rama.
Komentet Noka i bëri nga Paskuqani, në një takim për prezantimin e kandidatit të koalicionit “Bashkë Fitojmë” për Bashkinë e Kamzës, Arjan Hoxhës. Noka tha se në Paskuqan kryebashkiaku socialist Rakip Suli dhe qeveritarë të tjerë kanë bërë tender edhe për të prishur një shkollë.
Ai i dërgoi edhe një mesazh kryeministrit Rama nga Paskuqani, ku i tha se do të marrë përgjigjen e merituar në 14 maj.
“Kam parë shtëpi të boshatisura, pleq të braktisur. Po mendoja vallë si do të jetë sot ky takim, kur ky vend është shpopulluar si kurrë më parë? Por kjo pjesëmarrje është tregues i fitores së koalicionit “Bashkë Fitojmë”. 2021 ishte dita se ju korrët fitore historike. Paskuqani ka vuajtur nga korrupsioni i Ramës dhe Kipes këtu. Vetëm në Paskuqan ndodh që të bëhet një tender edhe për të prishur një shkollë.
Tender me 250 mijë euro për të prishur një shkollë kanë bërë vetëm në Paskuqan. Rama sillet nëpër Shqipëri me tallava, sepse nuk ka çfarë tjetër t’u thotë shqiptarëve. Kjo sjellje e tij do të marrë përgjigjen më të merituar. Ne do i kthejmë përgjigje Ramës ‘Ti erdhe sot si mister Tallavaja dhe prezantove mister Veshgjatin, por do ta marrësh përgjigjen’. Vota për Arjan Hoxhën është votë për të rikthyer opozitën në pushtet. Për të rikthyer andej nga erdhi Kipen. Diplomat e blera të Kipes do i hedhim në kosh”, u shpreh Noka.
Discussion about this post