Kapiteni i Flamurtarit, Andi Ribaj ishte i ftuar ditën e sotme në emisionin sportiv “Panorama Sport” në “Panorama TV”. Ai foli për objektivat e ekipit për tu ngjitur në Superiore, ndeshjen me Skënderbeun në fundjavë si dhe për trajnerin e ri Diego Longo.
“Shpresojmë të dalim me sukses në ndeshjen nga Skënderbeut, fusha do të tregojë çdo gjë. Ne e vlerësojmë maksimalisht. Do të kisha dëshirë që kjo ndeshje të ishte me tifozë, pres shumë që të fitojmë dhe të arrijmë objektivin. Duam 3 pikët. Hapat fals janë vetëvrasje për ekipin, humbja do të ndikonte keq tek ne. Nuk do të jemi të kënaqur me barazim ndaj Skënderbeut. Kemi bërë një sezon të mirë, por duhet të ishim në vend të parë dhe të ishim shumë pikë përpara.
Trajneri që ka ardhur ka shumë eksperiencë, po e tregon në stërvitje, jemi të kënaqur. Edhe Troisi punonte, por nuk arriti objektivat e presidencës. Diego Longo punon edhe me problemet më të vogla. Ndeshjet e ardhshme janë vendimtare, duam vetëm 3 pikët me të gjitha ekipet.
Unë besoj dhe mendoj se do të ngjitemi direkt në Superiore. Jemi ambientuar shumë mirë me trajnerin e ri. Nuk është se kam pasur oferta nga ekipet e Superiores, por nga jashtë. Por dua të ngjis Flamurtarin në Superiore dhe më pas do flas me Presidentin”, deklaroi ai në “Panorama TV”./Panorama/
Discussion about this post