Një prej të mbijetuarve të ngjarjes së rëndë në Bullgari ka rrëfyer momentin e tragjedisë dhe mënyrën se si ai arriti të shpëtoj. Sipas tij, shkaku i aksidentit ishte se shoferin e zuri gjumi dhe nuk mundi të merrte kontrollin e autobusit. Në një moment autobusi është përplasur me një bordurë dhe aty ka shpërthyer menjëherë në flakë, prandaj dhe pasagjerët e kishin të vështirë të dalin. “Ka pasur ndalesë 100 km para se me mbërrit në kufi të Bullgarisë, kemi bërë një pushim janë ndërruar shoferët. Për gjysmë ore muzika është ndalur dhe fëmijët nuk bënin më zhurmë. Aty kur i ka rënë bordurës i është çarë goma dhe ka marrë flakë përnjëherë. Shkaku ka qenë se shoferin e zuri gjumi”, tha ai
Ai rrëfen se si bashkë me të fejuarën çanë me çekiç xhamin e autobusit dhe u hodhën për t’u shpëtuar flakëve. I mbijetuari thotë se shumë të tjerë përpiqeshin të thyenin xhamat me këmbë, por ishte e pamundur çka rezultoi fatale për ta dhe u përpinë nga flakët. Ai tregoi se kanë parë tmerr me sy, një fëmijë të vogël 2 vjeç, që digjej nga flakët, pa mundësi shpëtimi.
“Autobusi ka qenë në flakë, askush nuk ka mundur të dilte jashtë autobusit. Nga viktimat më i vogli ka qenë nga 2 vjeç. Përveç meje janë hedhur edhe të tjerë nga dritarja. Koha ka qenë me shi.. Unë munda të dilja nga dritarja me të fejuarën. Njëri pas meje e provoi ta thyente me këmbë dritaren, por nuk u thye, unë mora çekiçin dhe e theva. E fejuara ka thyer këmbën, por pa rrezik”, tha ai gjatë një interviste televizive. Ndërsa u shpreh se gjithë skena ishte njëjtë sikur të shihje ferrin me sy.
Discussion about this post