I shumëkërkuari i drejtësisë shqiptare, Florenc Çapja ka mbërritur në aeroportin e Rinasit, me policinë shqiptare që ka finalizuar në këtë mënyrë operacionin e ekstradimit të tij nga Emiratet e Bashkuara Arabe.
Avioni që transportonte 44-vjeçarin mbërriti në aeroportin ndërkombëtar “Nënë Tereza” rreth orës 17.00 të kësaj të premte. Pas përfundimit të procedurave të rastit në komisariatin e Rinasit, Çapja do të transferohet në një nga blloqet e sigurisë në kryeqytet.
Vihet re një ndryshim në pamjen e 44-vjeçarit, i cili prej 8 vitesh i fshihej drejtësisë shqiptare në “parajsën” e Emiratave të Bashkuara Arabe. Ndryshimi është i madh në raport me një foto të vjetër të tij, që Policia e Shtetit dispononte, kur e kishte shpallur në kërkim ndërkombëtar, pasi tashmë duket me flokët e rëna dhe me mjekër.
Në njoftimin për ekstradimin e “të fortit” të Elbasanit, policia e cilëson Çapjan një shtetas me rrezikshmëri të lartë shoqërore, i akuzuar nga SPAK dhe Gjykata e Elbasanit, si porositës i 3 vrasjeve.
“Si rezultat i shkëmbimit të informacionit dhe koordinimit të veprimeve, me partnerët e Policisë së Shtetit, nëpërmjet strukturave të INTERPOL-it, në kuadër të fazës së radhës të operacionit policor ndërkombëtar të koduar “The Wanted”, u finalizua me sukses arrestimi për herë të dytë në Dubai dhe ekstradimi në Shqipëri, i të shumëkërkuarit ndërkombëtarisht, me rrezikshmëri të lartë shoqërore, shtetasit F. Ç., 44 vjeç, të lindur në Elbasan. 44-vjeçari është me masë sigurie “Arrest në burg”, nga GjKKO-ja, në vitin 2022, për veprën penale “Sigurimi i kushteve dhe mjeteve për të kryer vrasje”, kryer në kuadër të grupit të strukturuar kriminal, si dhe nga Gjykata e Elbasanit, në vitin 2021, për veprat penale ”Vrasja në rrethana cilësuese”, kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit’”, sqaron policia.
Florenc Çapja, një emër i njohur në botën e krimit në Shqipëri, kthehet në atdhe pas rreth 8 vitesh qëndrimi në Dubai, ku qëndronte i pashqetësuar, në mungesë të një marrëveshje ekstradimi mes dy vendeve.
Ai është i akuzuar nga SPAK për porositjen e vrasjes së Nezir dhe Gentian Beqirit në Elbasan në vitin 2012. Për këtë vepër, Çapja është dënuar me burgim të përjetshëm dhe do të vuajë dënimin në një burg të sigurisë së lartë në Shqipëri.
Florenc Çapja është nipi i Ardian Çapjas, i cili ka pasur përplasje me grupin e Suel Çelës. Grupi kriminal Çapja ka qenë i përfshirë në aktivitete kriminale që shtrihen përtej kufijve të Shqipërisë, duke përfshirë porosi vrasjesh dhe aktivitete të tjera të paligjshme në botën e narkotikëve.
Discussion about this post