Policia e Dibrës ka vënë në pranga drejtuesin e automjetit tip “Golf”, i cili teksa voziste në gjendje të dehur përplasi një oficer policie në rrugë, duke e lënë të plagosur rëndë.
Uniformat Blu bëjnë me dije se për ngjarjen e ndodhur ditën e djeshme, në vendin e quajtur “Kryqëzimi Velia”, është arrestuar Alban Shoti.
“Ju informojmë se specialistët e Sektorit të Qarkullimit Rrugor arrestuan shtetasin A.Sh. (M), 27 vjeç, banues në Dibër, për veprat penale “Shkelja e rregullave të qarkullimit rrugor”, “Drejtimi i automjeteve në mënyrë të parregullt’”, informon policia.
27-vjeçari përplasi efektivin Veli Gjura, teksa ky i fundit ishte në detyrë duke menaxhuar trafikun në kuadër të takimit elektoral përmbyllës të Partisë Demokratike në Peshkopi.
“27-vjeçari, teksa drejtonte automjetin e tij në gjendje të dehur, humbi kontrollin mbi drejtimin e automjetit dhe për pasojë automjeti përplasi punonjësin e Policisë, shtetasin V.Gj., 64 vjeç, i cili ndodhet në Spitalin e Traumës, nën kujdesin e mjekëve”, sqaron më tej policia.
Sakaq, nga aksidenti mbeti i lënduar edhe një 20-vjeçar, i cili po merr trajtim mjekësor në Spitalin e Peshkopisë dhe ndodhet jashtë rrezikut për jetën.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
Discussion about this post