Ish-Kryeministri Sali Berisha, po mban “Foltoren” në Devoll, nga ku u shpreh se më 11 dhjetor nuk do të ketë vetëm një rithemelim të Partisë Demokratike, por edhe të pluralizmit politik. Berisha tha se Foltorja u shndërrua në mrekullinë e dytë të Shqipërisë nga 1990 deri më sot.
Ai tha se Foltorja bashkoi rreth vetes qindra e mijëra demokratë, më shumë se çdo lëvizje tjetër demokratike në histori.
“Shqiptarët shohin te kjo lëvizje shpresën e tyre të vërtetë, idealet e tyre në veprim, besimin se Shqipëria do të çlirohet nga narko shteti” – tha Berisha.
Berisha tha se, sipas miqve të huaj të Shqipërisë, Foltorja është shndërruar në zhvillimin më pozitiv të viteve të fundit. Berisha tha se shqiptarët u ngritën mbi presionet e mëdha të narko-shtetit, pengut të narko-shtetit dhe presioneve të tjera krejt të pamerituara.
“Në 11 dhjetor inaugurojmë së bashku monumentin madhështor të rithemelimit të PD dhe pluralizmit shqiptar. Do e shndërrojmë PD në partinë e interesave të kombit shqiptar, të iniciativës së lirë, të mbrojtjes së dinjitetit. Pas humbjes së zgjedhjeve të 25 prillit humbëm çdo shpresë”, tha Berisha.
Në Foltoren e Devollit ishte i pranishëm edhe ish-Presidenti Bujar Nishani, si dhe drejtuesi politik i qarkut të Korçës, Edmond Spaho, si dhe kreu i degës së PD, Arben Miza.
Discussion about this post