Deputeti demokrat Ferdinand Xhaferaj në një intervistë për mediat ka analizuar përplasjet brenda Partisë Demokratike e cilësoi si të dëmshme foltoren e nisur nga ish-kryeministri Sali Berisha, duke deklaruar se ajo e dëmton PD-në dhe e pengon rikthimin e saj në pushtet.
“Në këtë konceptim lëvizja nuk e ndihmon PD-në. Foltorja është e vendosur keq në kohë, në maj dhe në qershor, ajo do e kishte kuptimin. Asaj kohe pamë kandidatët, Harxhi, Kadilli, Basha, Shehaj që ngritën Foltoren e tyre dhe Kuvendin Kombëtar, e çdo gjë mbaroi më 13 qershor. Është e vendosur keq në kohë, Berisha ta mbajë stafin gati në 2025, pasi kjo aktualja i shërben agjendës personale të zotit Berisha. Në llogaritë e veta i ka bërë kalkulimet se mund të konceptohet se është më i fortë kur është “non grata”, duke pasur prapa PD. Kjo llogari personale e Berishës e fut PD në tunel të errët, është konceptuar keq në kohë, është diametralisht kundër llogarive të PD-së” – tha Xhaferaj.
Ai gjithashtu është shprehur se barometri politik i mbështetjes së PD-së ka mbaruar në momentin kur Basha u rizgjodh kryetar i PD-së me 85% të votave. Deputeti demokrat e cilësoi mbushjen e sallave nga Berisha, por ritheksoi se kjo nuk është koha për të zhvilluar takime të tilla.
Xhaferaj është një nga deputetët e PD që ka mbështetur vendimin e Bashës. Ai së fundmi ka zëvendësuar deputetin Flamur Noka nga posti i nënkryetarit të Komisionit të Sigurisë. Noka u shkarkua nga kreu i PD-së, Lulzim Basha dy ditë më parë.
