Gjatë fjalës në seancën plenare, kreu i PD Lulzim Basha u ndal ndër të tjera dhe tek emërimi i ish-ministrit të Shëndetësisë Ilir Beqaj në krye të Agjencisë për menaxhimin e fondeve të donatorëve.
Basha tha me tone të ashpra se me këtë vendim, qeveria po valëvit Beqajn si flamur të pandëshkueshmërisë, duke dëshmuar se nuk i shërbejnë qytetarëve, por interesave personale.
“110 milionë euro që vitin tjetër do shkojnë për PPP-të, 51.2 milionë eurot që do shkojnë për luksin qeveritar, të shoqëruara me shpenzimet për agjencitë e Medias, atë të bashkëqeverisjes dhe atë për me menaxhimin e fondeve të donatorëve, që ia keni varur në qafë si mëlçitë ujkut, Ilir Beqajt. Ilir Beqaj i check-up it dhe dhjetëra bëmave të tjera të korrupsionit madhor po e valëvisni me krenari të pashpjegueshme përpara shqiptarëve dhe ndërkombëtarëve si flamur të pandëshkueshmërisë. Kripë në sytë e tyre duke dëshmuar se nuk jeni këtu për t’u shërbyer qytetarëve dhe nevojave që ata kanë, por interesave tuaja dhe të klientëve tuaj”, tha Basha.
Kjo deklaratë e Bashës vjen, pasi në kohën kur ishte në krye të ministrisë së Shëndetësisë, Ilir Beqaj ishte ne qender të kritikave për abuzimet me fondet, ku më i dëgjuar ishte tenderi i check-up, ku kompania që fitoi tenderin arriti të rekuperojë të gjithë investimin e vet brenda pak muajve nga nisja e aktivitetit, duke realizuar 45 milionë lekë të rinj fitim neto brenda nëntë muajve të parë të aktivitetit.
Discussion about this post