Në vitin 2022 zyrtarët e lartë të administratës në deklarimin vjetor të pasurisë në ILDKPKI, do të jenë të detyruar të publikojnë jo vetëm pasurinë e pronat e familjarëve të afërt, por edhe ata që do konsiderohen si persona të besuar të tyre por edhe të familjarëve.
Në Fletoren Zyrtarë janë publikuar formularët e rinj të deklarimit të pasurisë dhe konfliktit të interesave të nëpunësve të lartë të administratës, ku dallohet një shtim të dhënash për t’u plotësuar në formular, për ata që cilësohen si persona të besuar.
Në formular është shtuar një modul specifik i dedikuar për persona fizikë apo juridik dhe personave të besuar. Për këtë kategori personash, zyrtarët do të jenë të detyruar të deklarojnë lidhjen me ata vetë ose me familjarët, llojin e interesave private që ata kanë, si dhe vendndodhjen e tyre.
Ndërkohë të dhënat e tjera mbeten të pandryshuara, të cilat plotësohen në formularët e ILDKPKI-së: a) pasuritë e paluajtshme dhe të drejtat reale mbi to, sipas Kodit Civil; b) pasuritë e luajtshme, të regjistrueshme në regjistrat publikë, dhe të drejtat reale mbi to, sipas Kodit Civil; c) shpenzimet për shkollim apo sendet me vlerë të veçantë mbi 300 000 lekë; ç) vlerën e aksioneve, të letrave me vlerë dhe pjesët e kapitalit në zotërim; d) vlerën e likuiditeteve, gjendje në Cash jashtë sistemit bankar, në llogari rrjedhëse, në depozitë, në bono thesari dhe në huadhënie, në lekë ose në valutë të huaj.
Discussion about this post