Foto – Atentati në Francë, kush është shqiptari që mbeti i vrarë

Një vrasje u regjistrua të dielën në lagjen Teisseire të Grenoble-Francë, ku në një atentat mafioz u vra një shqiptar dhe u plagoswn tre të tjerë.

Ditën e sotme mediat vendase kanë publikuar identitetin e viktimës, – 47-vjeçari Ylli Bezhani, i cili raportohet se ka marrë 5 plumba në trup. Po ashtu kanë mbetur të plagosur rëndë edhe djali 24-vjeçar dhe nipi 21-vjeçar i viktimës, si dhe një tjetër shqiptar, të cilët po marrin trajtim në spital.

Autori i krimit, i cili dyshohet se ka qenë po ashtu një shtetas shqiptar, lëvizte me një skuter elektrik dhe pasi u afrua drejt shënjestrave, hapi zjarr drejt tyre. Autori shkarkoi karikatorin e pistoletës drejt 4 shqiptarëve dhe më pas u largua menjëherë.

Policia është ende në kërkim të tij. Ngjarja ndodhi pak para orës 20:00 në një zonë të qetë të qytetit.

Besohet se mes dy palëve ka pasur përplasje, por po verifikohen të gjitha pistat e mundshme, përfshi edhe ato që kanë të bëjnë me bizneset ilegale.

Sipas mediave lokale, Bezhani është sipërmarrës individual me qendër në ARTIGUES-PRES-BORDEAUX (33370), i specializuar në sektorin e punimeve të dyshemeve dhe mureve.

Prokurori i Grenoble, Eric Vaillant, njoftoi se është hapur një hetim për “vrasje” dhe “tentativë vrasjeje”.