Partia Socialiste mblodhi Asamblenë Kombëtare, në një takim që zgjati jo më shumë se 1 orë, i mbajtur me dyer të mbyllura dhe ku vendimet kishin të bënin me organizimin partiak.
Mbledhja u parapri nga lajme që u infiltrun fillimisht në mediat pranë Qeverisë dhe më pas u përhapën mbi shkarkimin e ministres së Financave, por që më pas si Delina Ibrahimaj ashtu edhe Kryeministri Edi Rama e mohuan ekzistencën e një vendimi të tillë.
Në mbledhjen e sotme anëtarët e Asamblesë miratuan që Bledi Çuçi, i shkarkuar dy javë më parë nga posti i ministrit të Brendshëm, të marrë drejtimin e Grupit Parlamentar, duke bërë një rrokadë pozicionesh me Taulant Ballën që mori postin ministror të lënë nga Çuçi.
Ndërkohë surprizë mund të konsiderohet vendimi për mënjanimin e Damian Gjiknurit, i cili në postin e Sekretarit të Përgjithshëm u zëvendësua nga Blendi Klosi. Megjithëse socialistët në 14 maj morën një rezultat historik zgjedhor, ndërsa Gjiknuri drejtoi fushatën në qarkun e Elbasanit duke fituar të gjitha Bashkitë, duket se nuk i ka mjaftuar për të vijuar të qëndrojë në detyrën e Sekretarit të Përgjithshëm.
Gjithashtu Asamblea e PS nuk pati asnjë vendimmarrje përsa i takon ndryshimeve të drejtuesve të PS në Qarqe.
Fotot e mëposhtme tregojnë momentet kur anëtarët e Asamblesë mblidhen, ndërsa bie në sy fakti se Gramoz Ruçi, një prej figurave qendrore të PS-së për gati 3 dekada, tashmë i tërhequr nga politika active shfaqet i lodhur, ndoshta nga mosha, apo nga temperatura e larta të motit.
Belinda Balluku dhe Niko Peleshi mundohen të ruajnë seriozitetin teksa futen në sallën e mbledhjes, ndërsa Erion Braçe dhe Damian Gjiknuri shfaqen të “vetmuar”. Ndërkohë që Erion Veliaj shfaqet si “ylli” i shoë të socialistëve, teksa mbështetësit e tij në Asamble e presin me adhurim.
Për më shumë shikoni fotot e mëposhtme.
Discussion about this post