Ekipeve zjarrfikëse i është dashur të ndërhyjnë në një situatë të rrallë pasditen e sotme në një pishinë private në Shkodër për të shpëtuar një fëmijë 10 vjeçar.
Fëmijës i kishte ngecur krahu në një nga tubat anësorë të pishinës dhe falë ndërhyrjes së shpejtë të zjarrfikëse është bërë e mundur shmangia e një ngjarjeje të rëndë.
Fëmija është larguar me barelë, teksa në dorë ka patur ende një pjesë të tubit.
Kryebashkiaku i Shkodrës, Benet Beci, ka falenderuar zjarrfikësit.
“Dita e sotme nuk ka qenë e lehtë për punonjësit e zjarrfikëses. Pas angazhimeve në shuarjen e zjarreve në dy zona, pasditja i ka gjetur në një tjetër situatë të vështirë. Një djalë 10 vjeçar ka mbetur i bllokuar në një nga pishinat e një biznesi privat.
Dora e tij ka mbetur e bllokuar në tubin fundor të pishinës, ku forcat e zjarrfikëses kanë ndërhyrë për të zbrazur në kohë pishinën, si dhe për të nxjerrë fëmijën pa dëmtuar krahun e tij. Falë punës e sacrificës së tyre, sot kanë arritur të fitojnë në emër të jetës! Faleminderit shumë, të gjithëve”, është shprehur ai.
Discussion about this post